അടൂര്‍ : വ്യത്യസ്ത മേഖലകളില്‍ മികവുപുലര്‍ത്തുന്ന 10നും 18നും ഇടയില്‍ പ്രായമുള്ള വിദ്യാര്‍ഥികള്‍ക്ക് സുഗതവനം ചാരിറ്റബിള്‍ ട്രസ്റ്റ് ഏര്‍പ്പെടുത്തിയ പ്രതിഭാ അമരപ്പട്ടം അവാര്‍ഡ് പിറന്ന നാടിന്‍റെ ചരിത്രം കുറിച്ച ആര്‍.രഞ്ജിനിക്ക് ഈമാസം 22ന് കലക്ടര്‍ ദിവ്യ എസ് അയ്യര്‍ സമ്മാനിക്കും. പള്ളിക്കല്‍ പയ്യനല്ലൂര്‍ കൊല്ലന്‍പറമ്പില്‍ പെയിന്‍റിങ് തൊഴിലാളിയായ രാജേഷിന്‍റെയും പയ്യനല്ലൂര്‍ ഗവ.എല്‍.പി സ്കൂള്‍ ജീവനക്കാരി രജനിയുടെയും മകളാണ് രഞ്ജിനി.
പത്താം ക്ലാസില്‍ പഠിക്കുമ്പോള്‍ ശില മ്യൂസിയം സംഘടിപ്പിച്ച പ്രാദേശിക ചരിത്ര രചനയില്‍ പള്ളിക്കലിന്‍റെ ചരിത്രമെഴുതി ഒന്നാംസ്ഥാനത്തെത്തി. ഇത് പിന്നീട് ‘പൈതൃകം തേടി പള്ളിക്കല്‍ ‘ എന്ന ഡോക്യുമെന്‍ററിയായി ജനശ്രദ്ധ പിടിച്ചുപറ്റി. ഇപ്പോള്‍ അത് ‘പള്ളിക്കലപ്പന്‍ ‘ പേരില്‍ പുസ്തകമായി. പഠനത്തിലും പിന്നിലല്ലാത്ത രഞ്ജിനിക്ക് പത്താംക്ലാസിലും പ്ലസ് ടുവിനും മുഴുവന്‍ വിഷയങ്ങള്‍ക്കും എ പ്ലസ് ഉണ്ടായിരുന്നു. വീട്ടു മുറ്റത്ത് ഒരു ഫലവൃക്ഷം വെച്ചുപിടിപ്പിക്കുന്നത് കൂടാതെ ഫലകവും പ്രശസ്തിപത്രവും 1001രൂപ കാഷ് അവാര്‍ഡും അടങ്ങുന്നതാണ് പുരസ്‌കാരം.
