തിരുവനന്തപുരം : തിരഞ്ഞെടുപ്പുമായി ബന്ധപ്പെട്ട ചർച്ചകൾ സജീവമാകുന്നതിനിടെ കെപിസിസിയിലും വലിയൊരു അഴിച്ചുപണിക്ക് കോൺഗ്രസ്. സണ്ണി ജോസഫ് മന്ത്രിസഭയിൽ എത്തുന്നതോടെ കെപിസിസിക്ക് പുതിയൊരു പകരക്കാരൻ എത്തും എന്നുള്ള വിവരങ്ങളാണ് പുറത്തുവരുന്നത്. മന്ത്രിസഭാ രൂപീകരണത്തിന് ശേഷമായിരിക്കും ഈ പുനസംഘടന ഉണ്ടാവുക. കെപിസിസി അധ്യക്ഷ പദവിയിൽ മാത്രമല്ല ജില്ലാ കോൺഗ്രസ് കമ്മിറ്റികളിലും വലിയ മാറ്റങ്ങൾ പ്രതീക്ഷിക്കുന്നുണ്ട്. നിലവിൽ എംഎൽഎമാരായി തിരഞ്ഞെടുക്കപ്പെട്ട മുഹമ്മദ് ഷിയാസ്, പ്രവീൺ തുടങ്ങിയ ഡിസിസി അധ്യക്ഷന്മാർക്ക് പകരം പുതിയ ആളുകളെ നിയോഗിക്കാൻ ഹൈക്കമാൻഡ് തീരുമാനിച്ചിട്ടുണ്ട്. എംഎൽഎമാരായവർ സംഘടനാ പദവികളിൽ തുടരേണ്ടതില്ലെന്നാണ് ഹൈക്കമാൻഡിന്റെ നിലപാട്.
പുതിയ കെപിസിസി അധ്യക്ഷനെ തിരഞ്ഞെടുക്കുമ്പോൾ സർക്കാരിലെ പ്രധാന പദവികളായ മുഖ്യമന്ത്രി, ധനമന്ത്രി, ആഭ്യന്തര മന്ത്രി എന്നിവർ ആരാണെന്ന് കൂടി പരിഗണിച്ചായിരിക്കും സന്തുലിതമായ ഒരു തീരുമാനമെടുക്കുക. ഇക്കാര്യത്തിൽ സണ്ണി ജോസഫിന്റെ കൂടി അഭിപ്രായം തേടിയ ശേഷമായിരിക്കും അന്തിമ തീരുമാനം.
