പത്തനംതിട്ട : കൊടും വേനലില് ജില്ലയിലെ നദികള് വറ്റിവരണ്ടുതുടങ്ങിയതോടെ പ്രതിസന്ധിയിലായിരിക്കുകയാണ് ശുദ്ധജല പദ്ധതികള്. ജില്ലയിലെ റാന്നി, കോന്നി, അടൂര്, തിരുവല്ല, ആറന്മുള നിയോജക മണ്ഡലങ്ങളിലായി ഒഴുകുന്ന അച്ചന്കോവിലാര്, കല്ലാര്, പമ്പയാര് എന്നിവ കേന്ദ്രീകരിച്ച് കേരള വാട്ടര് അതോറിറ്റിയുടെ കീഴില് നിരവധി ശുദ്ധജല വിതരണ പദ്ധതികളാണ് ഉള്ളത്. വേനല് കടുത്തതോടെ ഈ നദികളെല്ലാം ഏറെക്കുറെ വറ്റിവരണ്ട് തുടങ്ങി. ശുദ്ധജല പദ്ധതികളെ ഇന്ണ്ടേക് പമ്പ് ഹൗസുകളില് നിന്നും പമ്പ് ചെയ്യുന്ന ജലം ബൂസ്റ്റര് പമ്പ് ഹൗസുകളില് എത്തിയ ശേഷം ഇവിടെ നിന്നും നഗര സഭകളുടെയും ഗ്രാമപഞ്ചായത്തുകളുടെയും വിവിധ പ്രദേശങ്ങളിലേക്ക് പല ദിവസങ്ങളില് തുറന്നു വിടുകയാണ് ചെയ്യുന്നത്.
എന്നാല് നദികളിലെ ജലനിരപ്പ് ക്രമാതീതമായി കുറഞ്ഞു തുടങ്ങിയതോടെ പമ്പ് ചെയ്യാന് ആവശ്യമായ വെള്ളം വരും ദിവസങ്ങളില് ലഭിക്കാതെ വരുമെന്നാണ് കരുതുന്നത്. ഇത് രൂക്ഷമായ കുടിവെള്ള ക്ഷാമത്തിലേക്കും ജില്ലയെ എത്തിക്കും. ജില്ലയിലെ നഗര സഭകളിലും ഗ്രാമപഞ്ചായത്തിലെ ചിലയിടങ്ങളിലും പൂര്ണ്ണമായും കുടിവെള്ള പൈപ്പ് ലൈനുകളെ ആശ്രയിച്ച് കഴിയുന്നവരാണ് ഏറെയും. എല്ലാ തവണയും ഗ്രാമപഞ്ചായത്തുകളും നഗര സഭകളും പലയിടങ്ങളിലും ടാങ്കറുകളില് വെള്ളം എത്തിച്ച് കൊടുത്തിരുന്നു എങ്കിലും ഈ തവണ ഇതൊന്നും നടപ്പായില്ല. ഇത് രൂക്ഷമായ കുടിവെള്ള ക്ഷാമത്തിനും കാരണമായി തീര്ന്നിട്ടുണ്ട്.
