നെടുങ്കണ്ടം: സി.പി.എമ്മിന് എം.എം മണി ആശാനെങ്കില് കോണ്ഗ്രസുകാര്ക്ക് പ്രസിഡന്റാണ് ഇ.എം ആഗസ്തി. ഇത്തവണ ഉടുമ്പന്ചോലയില് ആശാനെ നേരിടുന്നത് കോണ്ഗ്രസുകാരുടെ പ്രിയപ്പെട്ട പ്രസിഡന്റാണ്. ജില്ലയിലെ ഏറ്റവും തലമുതിര്ന്ന നേതാവിനെ തന്നെ രംഗത്തിറക്കിയത് മണ്ഡലം തിരിച്ചു പിടിക്കുക എന്ന ലക്ഷ്യത്തോടെയാണെന്നാണ് കോണ്ഗ്രസ് പറയുന്നത്. മുമ്പ് എം.എം മണിയെ ഇതേ മണ്ഡലത്തില് പരാജയപ്പെടുത്തിയ ഇ.എം ആഗസ്തി എ.ഐ.സി.സി അംഗവും കൂടിയാണ്.
ഉടുമ്പന്ചോല നിയോജക മണ്ഡലത്തെ രണ്ടു തവണ പ്രതിനിധീകരിച്ച ആഗസ്തി എത്തുന്നതോടെ മണ്ഡലത്തിലെ യു.ഡി.എഫ് അണികളും ആവേശത്തിലാണ്. ജില്ലയിലെ കോണ്ഗ്രസില് ഇത്തവണ കാര്യമായ ഗ്രൂപ്പു പോരുകളില്ല എന്നതും ശ്രദ്ധേയമാണ്. മുമ്പ് രണ്ടു തവണ മത്സരിച്ചപ്പോഴും ആഗസ്തി നേടിയ വോട്ടുകള് എം.എം മണി നേടിയതിനെക്കാള് പതിനായിരത്തിലധികമാണ്. എ.ഐ.സി.സി സര്വേയിലും മണ്ഡലത്തില് ആഗസ്തി മത്സരിച്ചാല് വിജയസാധ്യത ഉണ്ടെന്ന് കണ്ടതോടെയാണ് മികച്ച സഹകാരിയും വാഗ്മിയുമായ ആഗസ്തിക്ക് നറുക്കു വീണത്.
മൂന്നാം വിജയം ലക്ഷ്യം വെച്ചെത്തുന്ന ആഗസ്തിക്ക് തടയിടാന് മണിയാശാന് സാധിക്കുമോ എന്നത് കാത്തിരുന്ന് കാണേണ്ട കാര്യമാണ്. ജില്ലയിലെ ഇരു പാര്ട്ടികളുടെയും അമരക്കാരായ ആശാനും പ്രസിഡണ്ടും തമ്മിലുള്ള പോരാട്ടം ഉടുമ്പന്ചോലയെ രാഷ്ട്രീയ ശ്രദ്ധാകേന്ദ്രം ആക്കുമെന്ന കാര്യം ഉറപ്പാണ്.
