റാന്നി : പെരുന്തേനരുവി റോഡില് നിന്നും വെച്ചൂച്ചിറ ചാത്തൻതറ റോഡിലേക്ക് പ്രവേശിക്കുന്ന ഭാഗം സ്ഥിരം അപകട മേഖലയായി മാറുന്നു. ഇന്നു വൈകീട്ട് നാലരയോടെ കാര് താഴെ റോഡിലേയ്ക്ക് മറിഞ്ഞതാണ് ഏറ്റവും ഒടുവില് സംഭവിച്ച അപകടം. മണ്ണടിശാല സ്വദേശികള് സഞ്ചരിച്ച കാറാണ് താഴെ റോഡിലേയ്ക്ക് പതിച്ചത്. ആര്ക്കും പരിക്കില്ല. ഇവിടേക്ക് പെരുന്തേനരുവി റോഡിലെ കുത്തു കയറ്റം കയറി വരുന്ന വാഹനം വെച്ചൂച്ചിറ ഭാഗത്തേക്കുള്ള കൊടും വളവ് തിരിയുമ്പോളാണ് അപകടം സംഭവിക്കുന്നത്.
വളവു തിരിയുന്ന വാഹനത്തിന്റെ സ്റ്റിയറിങ് വീല് വേഗം തിരികെ പോകാതെ വരുന്നതോടെ വീണ്ടും പെരുന്തേനരുവി റോഡിലേക്ക് തന്നെ പതിക്കുകയാണ്. ഇത്തരത്തില് അഞ്ചാമത്തെ വാഹനമാണ് ഇതേ രീതിയിൽ ഇവിടെ അപകടത്തിൽപ്പെടുന്നത്. എല്ലാ അപകടത്തിലും നിസാര പരിക്കുകളോടെ യാത്രക്കാര് രക്ഷപെടുന്നതിനാല് ഇവിടെ സുരക്ഷയൊരുക്കാന് ആരും ശ്രദ്ധിക്കാറില്ല. ബിഎം ആന്ഡ്ബിസി നിലവാരത്തിൽ നവീകരിച്ച റോഡില് ഇടിതാങ്ങി സ്ഥാപിച്ചിട്ടില്ല. ഇതുണ്ടായാല് വന് അപകടങ്ങള് ഒരു പരിധി വരെ ഒഴിവാക്കാനാവുമെന്ന് നാട്ടുകാര് അവകാശപ്പെട്ടു.
