കോന്നി : ചാങ്കൂർ മുക്ക് കുമ്പഴ റോഡിലെ കുഴികൾ അടക്കുന്നത് അശാസ്ത്രീയമായ രീതിയിൽ എന്ന് ആക്ഷേപമുയരുന്നു. ചാങ്കൂർ മുക്ക് മുതൽ കുമ്പഴ വരെയുള്ള റോഡിൽ പലയിടത്തും ചെറുതും വലുതുമായ നിരവധി കുഴികൾ രൂപപ്പെട്ടിട്ടുണ്ട്. ബി എം ആൻഡ് ബി സി സാങ്കേതിക വിദ്യയിൽ നിർമ്മിച്ച റോഡിൽ നിരവധി വാഹനങ്ങൾ സഞ്ചരിക്കുന്നുണ്ട്. പുനലൂർ മൂവാറ്റുപുഴ പാതയിൽ ഗതാഗത തടസം നേരിട്ടാൽ ഇതുവഴിയാണ് വാഹനങ്ങൾ വഴി തിരിച്ചു വിടുന്നത്. എന്നാൽ ഈ കുഴികളിൽ മെറ്റൽ ഇട്ട ശേഷം റോളർ ഉപയോഗിച്ച് ഉറപ്പിക്കേണ്ട ഭാഗങ്ങൾ ഇടിമുട്ടി ഉപയോഗിച്ച് കൈകൾ കൊണ്ട് ഇടിച്ച് ഉറപ്പിക്കുകയാണ് ചെയ്യുന്നത്.
ഇത് കാലക്രമേണ വീണ്ടും ഇളകി കുഴി രൂപപെടുന്നതിന് കാരണം ആകും. ആഞ്ഞിലി കുന്ന് കയറ്റത്തിന്റെ ഭാഗത്ത് മാസങ്ങൾക്ക് മുൻപ് ഇത്തരത്തിൽ കുഴി രൂപപെട്ടിട്ടും അധികൃതർ അടക്കാൻ തയ്യാറായില്ല. പിന്നീട് നാട്ടുകാർ മണ്ണ് വെട്ടി ഇട്ട് കുഴി നികത്തുകയായിരുന്നു. ആധുനിക രീതിയിൽ ടാർ ചെയ്ത റോഡിൽ കുഴികൾ രൂപപ്പെട്ടാൽ പെട്ടെന്ന് വരുന്ന ഇരു ചക്ര വാഹനങ്ങൾ അടക്കം കുഴിയിൽ വീഴുന്നതിന് സാധ്യത ഏറെയാണ്. പയ്യനാമൺ ഭാഗത്തെ പാറമടകളിൽ നിന്നും പോകുന്ന ടിപ്പർ ലോറികളുടെ സഞ്ചാരവും റോഡ് തകർച്ചക്ക് കാരണമാകുന്നുണ്ട്.