കോന്നി : വട്ടക്കാവ് മരങ്ങാട്ട് റോഡിലെ ഇളകിയ പൂട്ടുകട്ടകൾ അപകടക്കെണിയാകുന്നു. ചൈനാമുക്ക് പൂങ്കാവ് റോഡിനെയും കോന്നി ചന്ദനപ്പള്ളി റോഡിനെയും തമ്മിൽ ബന്ധിപ്പിക്കുന്ന പ്രധാന റോഡാണിത്. മുൻപ് കോൺക്രീറ്റ് ചെയ്തിരുന്ന ഭാഗമാണ് ഇടയ്ക്ക് ഇളക്കി മാറ്റി ഇന്റർ ലോക്ക് കട്ടകൾ പാകിയത്. എന്നാൽ ഇത് ഇളകി കുഴികൾ രൂപപെട്ടതോടെ റോഡിൽ അപകടങ്ങൾ പതിവാകുകയാണ്. ഇരുചക്ര വാഹനയാത്രക്കാരാണ് കൂടുതലും അപകടത്തിൽ പെടുന്നത്. മഴക്കാലമായാൽ റോഡിൽ ഈ ഭാഗത്ത് ചെളിയും വെള്ളവും നിറയുന്നതും അപകടങ്ങൾ വർധിപ്പിക്കുന്നു.
കോന്നി ഗ്രാമ പഞ്ചായത്തിൻറെ അധീനതയിൽ വരുന്ന റോഡിൽ അപകട ഭീഷണിയുള്ള ഈ ഭാഗത്ത് അധികൃതർ മുന്നറിയിപ്പ് ബോർഡുകളും സ്ഥാപിച്ചിട്ടില്ല. ഇളകിയ പൂട്ടുകട്ടകളിൽ ചെളി നിറഞ്ഞ് ഇരു ചക്ര വാഹന യാത്രക്കാരാണ് ഇവിടെ കൂടുതലും തെന്നി വീഴുന്നത്.ഇളകി മാറിയ പൂട്ടുകട്ടകൾ പകുതിയിൽ ഏറെയും പൊട്ടി പോയതുമാണ്.ഇവ മുഴുവനും ഇളക്കി മാറ്റി വീണ്ടും പുനഃസ്ഥാപിച്ചെങ്കിൽ മാത്രമേ അപകടങ്ങൾക്ക് പരിഹാരം കാണുവാൻ സാധിക്കുകയുള്ളൂ.റോഡ് അടിയന്തിരമായി സഞ്ചാര യോഗ്യമാക്കണമെന്ന് സി പി ഐ വട്ടക്കാവ് ബ്രാഞ്ച്കമ്മിറ്റി ആവശ്യപ്പെട്ടു.
