എടത്വ : കുട്ടനാട്ടില് നിര്മ്മാണത്തിലിരിക്കുന്ന ആലപ്പുഴ – ചങ്ങനാശ്ശേരി റോഡും അമ്പലപ്പുഴ പൊടിയാടി റോഡും ഉയര്ത്തണമെന്നാവശ്യപ്പെട്ട് പൊതുപ്രവര്ത്തകന് ഡോ.ജോണ്സണ് വി ഇടിക്കുള സംസ്ഥാന മുഖ്യമന്ത്രി പിണറായി വിജയന് നിവേദനം നല്കി. ആലപ്പുഴ – ചങ്ങനാശ്ശേരി, അമ്പലപ്പുഴ – തിരുവല്ല പാതകളില് വെള്ളംകയറിയതോടെ ഗതാഗതം പൂര്ണ്ണമായും നിലച്ചിരുന്നു. കെ.എസ്.ആര്.ടി.സി ബസ് സര്വീസുകള് നിര്ത്തിവെച്ചു. പമ്പാനദി കരകവിഞ്ഞ് ആലപ്പുഴ – അമ്പലപ്പുഴ – തിരുവല്ല പാതയില് നെടുമ്പ്രത്തും നീരേറ്റുപുറത്തും വെള്ളംകയറി. ഒരു കിലോമീറ്റര് ദൂരമുള്ള വെള്ളക്കെട്ടിലൂടെ എത്തുന്ന വലിയവാഹനങ്ങളടക്കം പോലീസും സന്നദ്ധപ്രവര്ത്തകരും ചേര്ന്ന് ഗതാഗതം നിയന്ത്രിച്ച് ഒരുവശത്തുകൂടി മാത്രമാണ് കടത്തിവിട്ടത്.
എ.സി റോഡില് കിഴക്കന് വെള്ളത്തിന്റെ വരവില് 11 ഇടങ്ങളിലാണ് വെള്ളംകയറിയത്. ഇതില് പള്ളിക്കൂട്ടുമ്മ, മാമ്പുഴക്കരി, മുട്ടാര് ജങ്ഷന്, കിടങ്ങറ, പാറക്കല് കലുങ്ക്, മനക്കച്ചിറ തുടങ്ങിയ സ്ഥലങ്ങളിലാണ് ഗതാഗത തടസ്സമുണ്ടായിരുന്നത്. പലയിടത്തും ഒരുകിലോമീറ്റര് ദൂരത്തിലാണ് വെള്ളം. വെള്ളത്തിലൂടെ സഞ്ചരിച്ച നിരവധി ഇരുചക്രവാഹനങ്ങള് പലതും കേടായി. എ.സി കനാല് വളച്ചുകെട്ടി താല്ക്കാലിക പാത ഒരുക്കിയ മാമ്പുഴക്കരിഭാഗത്തും വെള്ളത്തിന്റെ ഒഴുക്ക് ശക്തമായിരുന്നു. ഇതു മൂലം കുട്ടനാട്, അപ്പര്കുട്ടനാട് മേഖലയില് യാത്രാക്ലേശം രൂക്ഷമായിരുന്നു.
ഈ സാഹചര്യത്തില് നിര്മ്മാണത്തിലിരിക്കുന്ന ഈ റോഡുകള് പ്രളയത്തെ അതിജീവിക്കത്തക്ക നിലയില് ഉയര്ത്തണമെന്നാവശ്യപ്പെട്ടാണ് പൊതുമരാമത്ത് വകുപ്പ് മന്ത്രി പി.എ മുഹമ്മദ് റിയാസ്, സംസ്ഥാന മനുഷ്യാവകാശ കമ്മീഷന് എന്നിവര്ക്ക് ഡോ.ജോണ്സണ് വി ഇടിക്കുള നിവേദനം നല്കിയത്. കെ.എസ്.ടി.പി സെക്രട്ടറി, പ്രോജക്ട്സ് ഡയറക്ടര്, ചീഫ് എഞ്ചിനിയര്, (പ്രോജക്ട്സ്) എന്നിവരെ എതിര്കക്ഷികളാക്കിയാണ് സംസ്ഥാന മനുഷ്യാവകാശ കമ്മീഷന് ഡോ.ജോണ്സണ് വി ഇടിക്കുള നിവേദനം നല്കിയത്.