വടശ്ശേരിക്കര : വടശ്ശേരിക്കര ജംഗ്ഷനില് റോഡിന് മധ്യത്തിലായി രൂപപ്പെട്ട കുഴി കോൺക്രീറ്റ് ചെയ്ത് അടച്ചു. കുടിവെള്ള വിതരണ പൈപ്പ് പൊട്ടിയതിനെ തുടർന്ന് ആഴ്ചകൾക്ക് മുമ്പാണ് ഇവിടെ റോഡ് വെട്ടിപ്പൊളിച്ചത്. പൈപ്പ് അറ്റകുറ്റപ്പണി നടത്തിയ ശേഷം കുഴി മണ്ണിട്ട് മൂടിയെങ്കിലും പ്രദേശത്ത് വലിയ തോതില് പൊടിശല്യം അനുഭവപ്പെട്ടിരുന്നു. തിരക്കേറിയ ജംഗ്ഷനില് വാഹനങ്ങൾ കടന്നുപോകുമ്പോൾ ഉയരുന്ന പൊടിപടലങ്ങള് കാരണം കാൽനടയാത്രക്കാരും സമീപത്തെ വ്യാപാരികളും ഏറെ ദുരിതത്തിലായിരുന്നു.
പൊടിശല്യം രൂക്ഷമായതോടെ നാട്ടുകാരും വ്യാപാരികളും പ്രതിഷേധവുമായി രംഗത്തെത്തിയിരുന്നു. ജനങ്ങളുടെ നിരന്തരമായ പരാതിയെത്തുടര്ന്നാണ് കഴിഞ്ഞ ദിവസം അധികൃതരെത്തി റോഡിലെ കുഴി കോൺക്രീറ്റ് ചെയ്ത് പൂര്ണ്ണമായി അടച്ചത്. കോൺക്രീറ്റ് ചെയ്തതോടെ യാത്രക്കാരുടെയും വ്യാപാരികളുടെയും നീണ്ട നാളത്തെ ദുരിതത്തിനാണ് താത്കാലിക പരിഹാരമായത്.
