മല്ലപ്പള്ളി : മല്ലപ്പള്ളി താലൂക്ക് ആസ്ഥാനത്ത് സ്ഥിതി ചെയ്യുന്ന മിനി സിവിൽ സ്റ്റേഷനിലെ ജലവിതരണ പൈപ്പ് പൂട്ടി വാട്ടര് അതോറിറ്റി അധികൃതര്. പതിനാല് സര്ക്കാര് ഓഫീസുകളാണ് മല്ലപ്പള്ളി മിനി സിവില് സ്റ്റേഷനില് പ്രവര്ത്തിക്കുന്നത്. ഇതിലെ മൂന്ന് ഓഫീസുകള് വാട്ടര് അതോറിറ്റി ബില് അടയ്ക്കാതെ വന്നതാണ് കണക്ഷന് വിശ്ചേദിക്കാന് കാരണം. ഈ തുക അടയ്ക്കുന്നതിനായി ജീവനക്കാര് ഉന്നത ഉദ്യോഗസ്ഥര്ക്ക് റിപ്പോര്ട്ട് നല്കിയിരുന്നു. എന്നിട്ടും നടപടിയുണ്ടായില്ല.
കെട്ടിടത്തിലേക്കുള്ള വാട്ടര് അതോറിറ്റി കണക്ഷന് പൂര്ണ്ണമായി വിശ്ചേദിച്ചതിനാല് കെട്ടിടത്തില് പ്രവര്ത്തിക്കുന്ന തുക അടച്ച 11 ഓഫീസുകള്ക്കും കുടിവെള്ളം ലഭിക്കാതെയായി. വിവിധ ഓഫീസുകളില് ജോലി ചെയ്യുന്നവരില് കൂടുതലും വനിതാ ജീവനക്കാരാണ്. ദൈനംദിന ആവശ്യങ്ങൾക്ക് ജലമില്ലാതെ വനിതാ ജീവനക്കാരടക്കം ഒരാഴ്ച്ചയായി പ്രതിസന്ധിയിലായിരിക്കുകയാണ്. തുക അടയ്ക്കാനുണ്ടെന്ന കാരണത്താൽ യാതൊരു ദയയുമില്ലാതെ നിരപരാധികളായ ജീവനക്കാരെ പൈപ്പ് മുറിച്ച് ജലവിതരണം പൂട്ടി മുഖം തിരിച്ചിരിക്കുകയാണ് മല്ലപ്പള്ളിയിലെ വാട്ടർ അതോറിറ്റി ജീവനക്കാര്.
