റാന്നി : തിരക്കേറിയ റോഡരികില് നിര്ത്തിയിട്ടിരിക്കുന്ന റോഡ് റോളര് അപകട ഭീക്ഷണി ഉയര്ത്തുന്നു. പുനലൂര്-മൂവാറ്റുപുഴ സംസ്ഥാന പാതയിലെ ചെല്ലയ്ക്കാട് ബസ് കാത്തിരിപ്പു കേന്ദ്രത്തോടു ചേര്ന്നുള്ള ബസ് ബേയിലാണ് റോളര് നിര്ത്തിയിട്ടിരിക്കുന്നത്. രണ്ടാഴ്ചയ്ക്കു മുകളിലായി ഇത് ഇവിടെ ഇങ്ങനെ ഉപേക്ഷിച്ച നിലയില് കിടക്കാന് തുടങ്ങിയിട്ട്. സ്വകാര്യ കരാര് കമ്പനിയുടെ റോളര് നിര്മ്മാണ പ്രവര്ത്തനം കഴിഞ്ഞു മടങ്ങുന്നതിനിടയില് രാത്രിയായതോടെ ഇവിടെ നിര്ത്തി ഡ്രൈവര് മടങ്ങിയതാണ്.
ഇനി മറ്റു നിര്മ്മാണ പ്രവര്ത്തനങ്ങള് കരാറാകുന്നതു വരെ ഇതിവിടെ കിടക്കാനാണ് സാധ്യത. മുന്നറിയിപ്പു ബോര്ഡുകളൊന്നും ഇല്ലാത്തതിനാല് രാത്രിയില് അടുത്തെത്തുമ്പോള് മാത്രമെ ഇതു കാണുവാന് സാധിക്കു. ഉന്നത നിലവാരത്തില് നിര്മ്മാണം പൂര്ത്തീകരിച്ചതിനു പിന്നാലെ ഇവിടെ വാഹനങ്ങള് അമിത വേഗതയിലാണ് കടന്നു പോകുന്നത്. റോളര് ഇവിടെ നിന്നും മാറ്റുവാന് അധികൃതര് നടപടി എടുത്തില്ലെങ്കില് വലിയ അപകടത്തിന് സാധ്യതയേറെയാണ്.