കൊച്ചി : വീട്ടില് അതിക്രമിച്ചു കയറി ഉറങ്ങിക്കിടന്ന ഏഴു വയസുകാരിയെ കൊല്ലാന് ശ്രമം. കൊച്ചി അയ്യപ്പന്കാവിലാണ് കേസിനാസ്പദമായ സംഭവം. കൊല്ലാന് ശ്രമിച്ച കേസില് തമിഴ്നാട് സ്വദേശിയും തൃശൂര് ഒല്ലൂര് വിഎംവി അനാഥാലയത്തിലെ അന്തേവാസിയുമായ അബൂബക്കര് സിദ്ധിഖ്(27)ആണ് അറസ്റ്റിലായത്. വെള്ളിയാഴ്ച വൈകീട്ട് ആറ് മണിയോടെയാണ് അയ്യപ്പന്കാവില് വാടകയ്ക്ക് താമസിക്കുന്ന തെലങ്കാന സ്വദേശിനിയുടെ ഏഴ് വയസുകാരിയായ മകളെ ഇയാള് കൊല്ലാന് ശ്രമിച്ചത്. കുട്ടിയുടെ അമ്മയും 12 വയസുകാരിയായ സഹോദരിയും മാത്രമാണ് വീട്ടിലുണ്ടായിരുന്നത്.
യുവതിയും മൂത്ത മകളും വീടിന്റെ സിറ്റൗട്ടില് ഇരിക്കുമ്പോളാണ് സംഭവം. അക്രമി പാഞ്ഞടുത്തു വരുന്നതു കണ്ട് യുവതി 12 വയസുകാരിയായ മൂത്ത മകളെയും കൂടി നിലവിളിച്ചുകൊണ്ട് പുറത്തേക്കോടി. ഇതോടെ അക്രമി വീടിനുള്ളിലേക്ക് കയറി. അകത്ത് ഉറങ്ങിക്കിടന്ന ഇളയമകള് അമ്മയുടെ കരച്ചില്കേട്ട് എഴുന്നേറ്റ് അലറിക്കരഞ്ഞു. ഇതോടെ അബൂബക്കര് കുട്ടി കിടന്ന മുറിയില് കയറി വാതിലടച്ചു. പിന്നീട് കുട്ടിയെ വലിച്ചിഴച്ച് കുളിമുറിയിലെത്തിച്ച് ബക്കറ്റില് പലതവണ തല മുക്കിപ്പിടിച്ചു.
അബൂബക്കറിന്റെ കൈയില് കുട്ടി ശക്തിയായി കടിച്ചതോടെ ഇയാള് പിടിവിട്ടു. എന്നാല് കുട്ടിയുടെ ബോധം അപ്പോഴേക്കും പോയിരുന്നു. കരച്ചില് കേട്ട് നാട്ടുകാര് ഓടിക്കൂടിയതോടെ അബൂബക്കര് വാതില് തുറന്ന് പുറത്തു വന്നു. നാട്ടുകാര് ഇയാളെ തടഞ്ഞു വെച്ചു. പോലീസ് എത്തി അബൂബക്കറിനെ കസ്റ്റഡിയിലെടുത്തു. ഇയാള് തിരുവനന്തപുരം മാനസികാരോഗ്യ ആശുപത്രിയില് ചികിത്സയിലായിരുന്നുവെന്ന് പോലീസ് പറയുന്നു. നഗരത്തിലൂടെ അലഞ്ഞു നടക്കുന്നതിനിടെയാണ് ഇയാള് വീട്ടില് കയറി ആക്രമണം നടത്തിയത്. കഴുത്തില് പരിക്കേറ്റ കുട്ടിയെ ആശുപത്രിയില് എത്തിച്ച ശേഷം വീട്ടിലേക്ക് കൊണ്ടുപോയി.
