പത്തനംതിട്ട : അബാന് മേല്പാലത്തിന്റെ നിര്മ്മാണ പ്രവര്ത്തികളുടെ ഭാഗമായി അബാന് ജംഗ്ഷനില് റോഡ് തകര്ന്നതോടെ ഇരുചക്ര വാഹനയാത്രക്കാര് വലയുന്നു. അബാന് ജംഗ്ഷനില് നിന്നും മുത്തൂറ്റ് ആശുപത്രി ഭാഗത്തേക്കുള്ള റോഡ് പൂര്ണ്ണമായി അടച്ച ശേഷമാണ് സിവില് സ്റ്റേഷന് റോഡിലേക്ക് വാഹനങ്ങള് വഴി തിരിച്ചു വിട്ടത്. എന്നാല് ടാറിംഗ് പൂര്ണ്ണമായി ഇളകിപോയ റോഡില് വാഹനങ്ങള് കയറി ഇറങ്ങി റോഡിലെ സ്ലാബുകള് മുഴുവന് തെളിയുകയും വലിയ കുഴികള് രൂപപ്പെടുകയും ചെയ്തു. ഇതുവഴി വാഹന യാത്ര ദുഷ്കരമായതോടെ സ്ലാബ് തെളിഞ്ഞ ഭാഗത്ത് അധികൃതര് മെറ്റല് ഉപയോഗിച്ച് നികത്തി റോഡ് ഗതാഗത യോഗ്യമാക്കുവാന് ശ്രമം നടത്തിയെങ്കിലും കഴിഞ്ഞില്ല.
വാഹനം കയറി ഇറങ്ങി റോഡ് വീണ്ടും കുഴിയായി മാറിയതോടെ ഇരുചക്ര വാഹനങ്ങള് ഉള്പ്പെടെ ഇവിടെ മറിഞ്ഞു വീഴുന്നതും പതിവായി. ഓടയുടെ സ്ലാബിന്റെ കമ്പികള് തെളിഞ്ഞു നില്ക്കുന്നതാണ് മറ്റൊരു പ്രധാന പ്രശ്നം. കമ്പികള് വാഹനങ്ങളുടെ ടയറുകളില് കുത്തികയറി അപകടങ്ങള് സംഭവിക്കുന്നതിനുള്ള സാധ്യതയും ഏറെയാണ്. കോഴഞ്ചേരി ഭാഗത്തേക്കും സ്റ്റേഡിയം ഭാഗത്തേക്കും അടക്കം വാഹനങ്ങള് ഈ വഴിയാണ് കടന്നു പോകുന്നത്. എതിരെ വാഹനങ്ങള് വരുമ്പോള് ഒഴിഞ്ഞു മാറാന് പോലും കഴിയാത്ത അവസ്ഥയാണ് നിലവിലുള്ളത്.
പൊടിപടലങ്ങളുടെ ശല്യം മറ്റൊരു വഴിക്ക്. ഇടയ്ക്ക് ഒരു മഴ കൂടി പെയ്തതോടെ യാത്ര കൂടുതല് ദുരിതപൂര്ണ്ണമായി. ഇത്രയും വാഹനങ്ങള് കടന്നുപോകുന്ന റോഡ് താത്കാലികമായി എങ്കിലും സഞ്ചാരയോഗ്യമാക്കുവാന് കഴിയാതെ വന്നത് അധികൃതരുടെ ഭാഗത്ത് നിന്നുള്ള ഗുരുതരമായ വീഴ്ച്ചയാണ്.
