ഹരിപ്പാട് : ബൈക്ക് യാത്രികന്റെ പണവും മൊബൈല് ഫോണും പിടിച്ചു പറിച്ച രണ്ടു പേര് അറസ്റ്റില്. വ്യാഴാഴ്ച പുലര്ച്ചെ രണ്ടരയോടെ ദേശീയപാതയില് നങ്ങ്യാര്കുളങ്ങര ടി.കെ.എം.എം കോളേജ് ജംഗ്ഷനിലെ ബസ്റ്റോപ്പില് ഇരുന്ന നെയ്യാറ്റിന്കര സ്വദേശിയുടെ പണവും മൊബൈല് ഫോണും ആണ് പ്രതികള് മോഷ്ടിച്ചത്. കൃഷ്ണപുരം നക്കനാല് താഴ്ച വടക്കതില് ഷിബു (ചക്ക ഷിബു -27), ചൂനാട് നാമ്പു കുളങ്ങര കാട്ടിലേക്ക് പുത്തന്വീട്ടില് നസീം (20) എന്നിവരെയാണ് ഹരിപ്പാട് പോലീസ് അറസ്റ്റ് ചെയ്തത്.
നിര്മ്മാണ തൊഴിലാളിയായ സുനില് മലപ്പുറം പെരിന്തല്മണ്ണയില്നിന്ന് ബൈക്കില് തിരുവനന്തപുരം നെയ്യാറ്റിന്കരയിലേക്ക് പോകുന്നതിനിടയില് വിശ്രമിക്കാനാണ് നങ്ങ്യാര്കുളങ്ങരയിലെ ബസ്റ്റോപ്പില് അല്പസമയം നിര്ത്തിയത്. ഈ സമയം ബൈക്കിലെത്തിയ പ്രതികള് സുനിലിനെ ഭീഷണിപ്പെടുത്തി കൈവശമുണ്ടായിരുന്ന 4680 രൂപയും 13000 രൂപയോളം വിലവരുന്ന മൊബൈല് ഫോണും തട്ടിയെടുത്തത്. പിന്നീട് പ്രതികള് ദേശീയപാതയില് ഹരിപ്പാട് ഭാഗത്തേക്ക് പോവുകയും ചെയ്തു.
തുടര്ന്ന് സുനില് സ്റ്റേഷനിലെത്തി പരാതി നല്കി. പ്രതികള് എത്തിയ ബൈക്കിന്റെ നമ്പര് സുനില് ശ്രദ്ധിച്ചിരുന്നു. വാഹന ഉടമ വള്ളികുന്നം സ്വദേശിയാണെന്ന് പോലീസ് കണ്ടെത്തി. തല്കാല ആവശ്യത്തിന് ബൈക്ക് നസീം എടുത്തു കൊണ്ട് പോയതായിരുന്നത്രെ. തുടര്ന്ന് പോലീസ് നസീമിനെയും കൂടെയുണ്ടായിരുന്ന ഷിബുവിനെയും കസ്റ്റഡിയിലെടുക്കുകയായിരുന്നു. മോഷ്ടിച്ച പണവും മൊബൈല് ഫോണും പ്രതികളില് നിന്ന് കണ്ടെടുത്തിട്ടുണ്ട്. ഹരിപ്പാട് സി.ഐ ബിജു നായര്, എസ്.ഐ. രാജ് കുമാര്, എ.എസ്.ഐ. സുജിത്ത്, സി.പി.ഒ. മാരായ നിഷാദ്, നിസാമുദ്ദീന്, വിഷ്ണു എന്നിവരടങ്ങിയ സംഘമാണ് പ്രതികളെ പിടികൂടിയത്.
