തിരുവല്ല : റെയിൽവേ സ്റ്റേഷനിൽ എത്തി ബഹളം വയ്ക്കുകയും സ്റ്റേഷൻ മാസ്റ്ററോട് രൂക്ഷമായി പെരുമാറുകയും ചെയ്തത് ചോദ്യം ചെയ്ത ആർപിഎഫ് ഉദ്യോഗസ്ഥന് മൂന്നംഗ സംഘത്തിന്റെ മർദനം. തലയ്ക്കു പരുക്കേറ്റ ആർപിഎഫ് ഉദ്യോഗസ്ഥൻ ശാന്തറാവുവിനെ (56) തിരുവല്ല താലൂക്ക് ആശുപത്രിയിൽ പ്രവേശിപ്പിച്ചു. ഇന്നലെ വൈകിട്ട് 6ന് ആണ് സംഭവം. സുഹൃത്തിനെ യാത്ര അയയ്ക്കാൻ എത്തിയ സംഘമാണ് അക്രമം കാട്ടിയത്.
ഇവർ ലഹരി ഉപയോഗിച്ചിരുന്നതായി പോലിസ് പറഞ്ഞു. ശാന്തറാവുവിനെ മർദിച്ച് അവശനാക്കി. നെറ്റിയിലും തലയ്ക്കും പരുക്കേറ്റ ഉടൻതന്നെ തിരുവല്ല പോലീസ് എത്തി പ്രതികളെ കീഴടക്കുകയായിരുന്നു. സിഐ പി.ബി. വിനോദിന്റെ നേതൃത്വത്തിലുള്ള പോലീസ് അക്രമി സംഘത്തിൽ ഒരാളെ ഓടിച്ചിട്ട് പിടിക്കുകയായിരുന്നു. ആലപ്പുഴ ചമ്പക്കുളം മയ്യൻകുഴി അജി (32), തിരുവല്ല മഞ്ഞാടി ഉതിമൂട്ടിൽ ജിബിൻ (27), കവിയൂർ കുന്നിൽ താഴെ ശ്രീജിത്ത് ( ലിജിൻ–32) എന്നിവരാണ് കസ്റ്റഡിയിലുളളത്. തുടർനടപടികൾ കോട്ടയം റെയിൽവേ പോലീസ് സ്വീകരിക്കുമെന്ന് തിരുവല്ല സിഐ പറഞ്ഞു.
