റാന്നി : റാന്നി നിയോജകമണ്ഡലത്തിലെ രണ്ട് ആദിവാസി കോളനികൾക്ക് അംബേദ്കർ സെറ്റിൽമെൻറ് ഡവലപ്മെന്റ് പദ്ധതിയിൽ ഉൾപ്പെടുത്തി വിവിധ വികസന പ്രവർത്തനങ്ങൾ നടത്തുന്നതിനായി 1 കോടി രൂപ വീതം അനുവദിച്ചതായി അഡ്വ പ്രമോദ് നാരായൺ എംഎൽഎ പറഞ്ഞു. പെരുനാട് പഞ്ചായത്തിലെ അട്ടത്തോട് കിഴക്കേക്കര കോളനി, നാറാണംമൂഴി പഞ്ചായത്തിലെ അടിച്ചിപ്പുഴ കോളനി എന്നിവയ്ക്കാണ് ഫണ്ട് അനുവദിച്ചത്. സംസ്ഥാന നിർമ്മിതികേന്ദ്രം ആണ് നിർവഹണ ഏജൻസി.
ഓരോ കോളനിയുടെയും സമഗ്ര വികസനമാണ് പദ്ധതി വഴി ലക്ഷ്യമിടുന്നത്. കോളനിയിലേക്കുള്ള പ്രധാന പാതകളുടെ നവീകരണം, വീടുകളുടെ സംരക്ഷണഭിത്തി നിർമ്മാണം, പൊതുഇടങ്ങളിൽ കമ്മ്യൂണിറ്റി ഹാൾ ,കുടിവെള്ള പദ്ധതി ,സ്വയം തൊഴിലിനുള്ള പദ്ധതികൾ, ശുചീകരണം മഴവെള്ള സംഭരണികൾ എന്നിവയെല്ലാം പദ്ധതിയിൽ ഉൾപ്പെടുത്തിയിട്ടുണ്ട്.