കോഴിക്കോട് : സിപിഐ എം ജില്ലാ കമ്മിറ്റി ഓഫീസിനു നേരെ ബോംബെറിഞ്ഞ കേസില് വിദേശത്തായിരുന്ന ആര്എസ്എസ് പ്രവര്ത്തകന് അറസ്റ്റില്. മൂന്നാം പ്രതി നാദാപുരം പുറമേരി സ്വദേശി കൂരോരത്ത് വീട്ടില് നജീഷ് (40) ആണ് അറസ്റ്റിലായത്. സംഭവ ശേഷം ദുബായിലേക്ക് കടന്ന പ്രതിക്കായി ക്രൈംബ്രാഞ്ച് ബ്ലൂ കോര്ണര് നോട്ടീസ് പുറപ്പെടുവിച്ചിരുന്നു. ദുബായ് പോലീസ് അറസ്റ്റ് ചെയ്ത പ്രതിയെ കേരള പോലീസിന് കൈമാറുകയായിരുന്നു. വെള്ളിയാഴ്ച പുലര്ച്ചെ കരിപ്പൂര് വിമാനത്താവളത്തില് എത്തിയ പ്രതിയെ ക്രൈംബ്രാഞ്ച് ഡിവൈഎസ്പി ടി പി സജീവന്റെ നേതൃത്വത്തില് പോലീസ് കസ്റ്റഡിയില് വാങ്ങി. പ്രതിയെ ജില്ലാകമ്മിറ്റി ഓഫീസ് ജീവനക്കാര് തിരിച്ചറിഞ്ഞു.
2017 ജൂണ് ഏഴിന് പുലര്ച്ചെ ഒന്നരയോടെയാണ് ജില്ലാക്കമിറ്റി ഓഫീസിനു നേരെ ആര്എസ്എസ് ക്രിമിനല് സംഘം ബോംബെറിഞ്ഞത്. ജില്ലാ സെക്രട്ടറി പി മോഹനന് ഓഫീസിലെത്തുന്നതിന് മിനിട്ടുകള്ക്ക് മുമ്പായിരുന്നു ആക്രമണം. കേസില് രണ്ടു പേര് നേരത്തെ അറസ്റ്റിലായിരുന്നു. കോഴിക്കോട് സ്വദേശി രൂപേഷ്, നാദാപുരം സ്വദേശി ഷിജി എന്നിവരാണ് അറസ്റ്റിലായത്. ആര്എസ്എസ് ജില്ലാ കാര്യവാഹകരായിരുന്നു രൂപേഷ്. ഷിജിയും നിജീഷും സജീവ ആര്എസ്എസ് പ്രവര്ത്തകനാണ്.
അക്രമികള്ക്കെതിരെ വധശ്രമത്തിന് ഐപിസി 307ാം വകുപ്പ് പ്രകാരവും സംഘം ചേര്ന്ന് അതിക്രമം നടത്തുകയും ഗൂഢാലോചന നടത്തുകയും ചെയ്തതിന് 143, 144, 147, 148, 149, 458 വകുപ്പുകള് പ്രകാരവും സ്ഫോടക വസ്തു നിരോധന നിയമത്തിലെ 3, 5 വകുപ്പുകള് പ്രകാരവുമാണ് കേസ് രജിസറ്റര് ചെയ്തത്. ലോക്കല് പോലീസിന്റെ അന്വേഷണത്തില് പുരോഗതി ഇല്ലാത്തതിനെ തുടര്ന്ന് അന്വേഷണം ക്രൈംബ്രാഞ്ചിനെ ഏല്പ്പിക്കുകയായിരുന്നു.
