ന്യൂഡല്ഹി : ഇന്ത്യന് വിദ്യാര്ഥികളെ മനുഷ്യകവചമാക്കുന്നുവെന്ന ആരോപണം തള്ളി വിദേശകാര്യമന്ത്രാലയം. യുക്രെയ്നിലുള്ള ഇന്ത്യക്കാരുമായി നിരന്തരമായി ബന്ധപ്പെട്ട് വരികയാണെന്നും കേന്ദ്രസര്ക്കാര് വ്യക്തമാക്കി. ഇന്ത്യക്കാരെ ബന്ദികളാക്കിയെന്ന വിവരം ഇതുവരെ എവിടെ നിന്നും ലഭിച്ചിട്ടില്ലെന്നും കേന്ദ്രസര്ക്കാര് അറിയിച്ചു. വിദ്യാര്ഥികളെ ബന്ദികളാക്കിയെന്ന റിപ്പോര്ട്ട് ഇതുവരെ ലഭിച്ചിട്ടില്ല. ഖാര്ക്കീവില് നിന്നും സമീപപ്രദേശങ്ങളിലും നിന്നും ഇന്ത്യന് വിദ്യാര്ഥികള്ക്ക് യാത്ര ചെയ്യുന്നതിനായി പ്രത്യേക ട്രെയിനുകള് ഏര്പ്പെടുത്തണമെന്ന് യുക്രെയ്ന് സര്ക്കാറിനോട് അഭ്യര്ഥിച്ചിട്ടുണ്ട്.
യുക്രെയ്നിന്റെ കിഴക്കന് മേഖലകളില് കുടുങ്ങിക്കിടക്കുന്നവരെ പടിഞ്ഞാറന് പ്രദേശങ്ങളിലെത്തിക്കുന്നതിനുള്ള ശ്രമങ്ങളാണ് പുരോഗമിക്കുന്നതെന്ന് വിദശേകാര്യമന്ത്രാലയം വക്താവ് അരിന്ദം ബാച്ചി പറഞ്ഞു. നേരത്തെ തങ്ങള്ക്ക് ലഭിച്ച വിവരമനുസരിച്ച് ഇന്ത്യന് വിദ്യാര്ഥികളെ ഖാര്ക്കീവ് വിടാന് യുക്രെയ്ന് അനുവദിക്കുന്നില്ലെന്ന് മനസിലാക്കിയെന്ന് റഷ്യ അറിയിച്ചിരുന്നു. അവരെ മനുഷ്യകവചമാക്കുകയാണ് യുക്രെയ്ന് ചെയ്യുന്നത്. ഇന്ത്യന് പൗരന്മാരെ സുരക്ഷിതമായി യുക്രെയ്നില് നിന്നും പുറത്തെത്തിക്കാനുള്ള നടപടികള് സ്വീകരിക്കാന് റഷ്യ തയാറാണ്. പിന്നീട് റഷ്യയില് നിന്നും ഇന്ത്യയുടെ വിമാനങ്ങളിലോ തങ്ങളുടെ വിമാനത്തിലോ ഇവരെ നാട്ടിലെത്തിക്കാന് തയാറാണെന്നും റഷ്യന് പ്രതിരോധ മന്ത്രാലയം അറിയിച്ചിരുന്നു.
