പത്തനംതിട്ട : ശബരിമല പ്രസാദമടങ്ങുന്ന കിറ്റ് വീട്ടിലെത്തിക്കാൻ തപാൽ വകുപ്പ്. തപാൽ വകുപ്പ് കേരള സർക്കിൾ തിരുവിതാംകൂർ ദേവസ്വം ബോർഡുമായി ഉണ്ടാക്കിയ കരാറിന്റെ അടിസ്ഥാനത്തിലാണ് ബുക്കിംഗ് സംവിധാനം ഒരുക്കിയത്.
ശബരിമലയിലെ അരവണപ്രസാദവും ആടിയ ശിഷ്ടം നെയ്യും വിഭൂതി പ്രസാദവും കുങ്കുമവും മഞ്ഞൾപ്പൊടിയും അടങ്ങുന്ന പ്രസാദ കിറ്റിന് സ്വാമിപ്രസാദം എന്നാണ് പേരിട്ടിരിക്കുന്നത്. സ്വാമി പ്രസാദം കിറ്റിന്റെ ഓൺലൈൻ ബുക്കിംഗ് ദേവസ്വം മന്ത്രി കടകംപള്ളി സുരേന്ദ്രൻ ഉദ്ഘാടനം ചെയ്തു. അരവണ, നെയ്യ്, കുങ്കുമം, മഞ്ഞൾ, വിഭൂതി, അർച്ചന പ്രസാദം എന്നിവയടങ്ങുന്ന കിറ്റിന് 450 രൂപയാണ് വില.
ഇന്ത്യയിലെ ഏത് പോസ്റ്റ് ഓഫീസിൽ നിന്നും ഇ-പേയ്മെൻ്റിലൂടെ കിറ്റ് ബുക്ക് ചെയ്യാം. സ്പീഡ് പോസ്റ്റിലൂടെയാകും കിറ്റ് വീടുകളിലെത്തിക്കുക. നവംബർ 6 മുതൽ ബുക്കിംഗ് ആരംഭിക്കും. നവംബർ 16 മുതലാണ് കിറ്റുകൾ അയച്ചു തുടങ്ങുന്നത്. ചടങ്ങിൽ ചീഫ് പോസ്റ്റ്മാസ്റ്റർ ജനറൽ വി. രാജരാജൻ, ദേവസ്വം കമ്മീഷണർ ബി. എസ് തിരുമേനി, പോസ്റ്റൽ സർവീസ് ഡയറക്ടർ സയ്യിദ് റഷീദ് എന്നിവർ പങ്കെടുത്തു.
