ദില്ലി: രാജസ്ഥാന് മുഖ്യമന്ത്രി അശോക് ഗെലോട്ടിനെതിരെ വീണ്ടും വിമര്ശനവുമായി മുന് ഉപമുഖ്യമന്ത്രി സച്ചിന് പൈലറ്റ്. രാജസ്ഥാനിലെ ബിജെപിയുടെ അഴിമതിയില് നടപടി വേണമെന്ന ആവശ്യം വീണ്ടും ആവര്ത്തിച്ചിരിക്കുകയാണ് സച്ചിന് പൈലറ്റ്. തന്റെ ഏകദിന ഉപവാസം തുടങ്ങിയിട്ട് രണ്ടാഴ്ചയായെന്നും ഇതുവരെ നടപടിയൊന്നും ഉണ്ടായിട്ടില്ലെന്നും പൈലറ്റ് പറഞ്ഞു. അഴിമതിക്കെതിരെ നടപടി ആവശ്യപ്പെടുന്നതിനെ പോലും പാര്ട്ടി വിരുദ്ധ പ്രവര്ത്തനമെന്നാണ് വിളിക്കുന്നതെന്നും അദ്ദേഹം പറഞ്ഞു.
പ്രതിപക്ഷത്തിരിക്കുമ്പോള് കോണ്ഗ്രസ് വസുന്ധര രാജെയുടെ ഭരണകാലത്തെ അഴിമതി വിഷയം ഉന്നയിച്ചുവെന്നും, അക്കാര്യം പറഞ്ഞാണ് കോണ്ഗ്രസ് അധികാരത്തില് എത്തിയതെന്നും സച്ചിന് പൈലറ്റ് പറഞ്ഞു. അഴിമതിക്കും അനീതിക്കുമെതിരെ ശബ്ദമുയര്ത്തുക എന്നത് കോണ്ഗ്രസ് പാര്ട്ടിയുടെ മൂല്യങ്ങളില് പെട്ടതാണ്. ഈ മൂല്യങ്ങള് പാലിച്ച് ഏപ്രില് 11ന് ഞാന് ഏകദിന ഉപവാസം ആചരിച്ചു. ഇന്ന് രണ്ടാഴ്ച പിന്നിടുന്നു, ഇതുവരെ ഒരു നടപടിയും ഉണ്ടായിട്ടില്ലെന്നും പൈലറ്റ് പറഞ്ഞു
