കോന്നി : പുനലൂര് – മൂവാറ്റുപുഴ സംസ്ഥാന പാതയില് വാഹനാപകടത്തില് തകര്ന്ന സുരക്ഷാ വേലികള് കാല് നടയാത്രക്കാര്ക്ക് ഭീഷണിയാകുന്നു. മാമ്മൂട് ഭാഗത്താണ് വാഹനാപകടത്തില് തകര്ന്ന ഇരുമ്പ് വേലികള് നടപ്പാതയില് തന്നെ കൂട്ടിയിട്ടിരിക്കുന്നത്. കാല് നടയാത്രക്കാര് നടന്നുപോകുമ്പോള് ഇതില് തട്ടി വീണ് അപകടം സംഭവിക്കാനുള്ള സാധ്യത കൂടുതലാണ്. സംസ്ഥാന പാതയില് ഏറ്റവും കൂടുതല് അപകടങ്ങള് നടക്കുന്ന സ്ഥലങ്ങളില് ഒന്നാണ് കോന്നി മാമ്മൂട്. വിവിധ സമയങ്ങളില് നടന്ന അപകടങ്ങളില് ഒടിഞ്ഞുപോയ സുരക്ഷാ വേലികള് ഇവിടെ പലയിടത്തും കിടപ്പുണ്ട്. ഇവയൊന്നും പുനസ്ഥാപിക്കപ്പെട്ടിട്ടില്ല.
പൈപ്പുകളുടെ കൂര്ത്ത ഭാഗങ്ങള് പലതും റോഡിലേക്കും നടപ്പാതകളിലേക്കും നില്പ്പുണ്ട്. ഇതും കാല് നടയാത്രക്കാര്ക്ക് ഭീഷണിയാണ്. വാഹനങ്ങള് ഇടിച്ചതിനെ തുടര്ന്ന് നടപ്പാതകള്ക്ക് ഉള്ളിലേക്ക് വളഞ്ഞു നില്ക്കുന്ന കമ്പികള് കാല് നടയാത്രയ്ക്ക് തടസമാകുന്നുണ്ട്. മാമ്മൂട് മുതല് ചിറ്റൂര് മുക്ക് വരെയും നടപ്പാതകളില് വേലികള് ഒടിഞ്ഞു കിടക്കുന്നുണ്ട്. ഇത് അടിയന്തിരമായി പുനസ്ഥാപിക്കണമെന്നും നാട്ടുകാര് ആവശ്യപ്പെടുന്നു.
