കൊച്ചി: കെ.എസ്.ആര്.ടി.സി ജീവനക്കാരുടെ ശമ്പളവിതരണത്തില് ഉത്തരവാദിത്തമില്ലെന്ന് സംസ്ഥാന സര്ക്കാര് ഹൈക്കോടതിയില്. ഹൈക്കോടതിയില് സമര്പ്പിച്ച സത്യവാങ്മൂലത്തിലാണ് സര്ക്കാര് നിലപാട് ആവര്ത്തിച്ചു വ്യക്തമാക്കിയത്. കാര്യക്ഷമതയില്ലാത്ത കോര്പ്പറേഷന് ശമ്പളത്തിനായി പണം നല്കേണ്ട ബാധ്യത സര്ക്കാരിനില്ലെന്നും വ്യക്തമാക്കി. തൊഴിലാളികളുടെ ഭാഗത്തുനിന്ന് ആവശ്യമായ സഹകരണം ലഭിക്കുന്നില്ല. 2017-18 മുതലുള്ള അഞ്ച് വര്ഷം കെ.എസ്.ആര്.ടി.സിക്ക് 6731 കോടി രൂപ നല്കിയെന്നും സര്ക്കാര് സത്യവാങ്മൂലത്തില് പറയുന്നു.
അതേസമയം ശമ്പളം ലഭിക്കാത്തതിന് പ്രതിഷേധിച്ച വനിത കണ്ടക്ടര്ക്കെതിരെ നടപടി. ബാഡ്ജ് കുത്തി പ്രതിഷേധിച്ച വൈക്കം ഡിപ്പോയിലെ കണ്ടക്ടര് അഖില.എസ്.നായരെ സ്ഥലം മാറ്റിയിരിക്കുകയാണ്. അഖിലയെ പാല യൂണിറ്റിലേക്കാണ് സ്ഥലം മാറ്റിയിരിക്കുന്നത്. ‘ശമ്പള രഹിത സേവനം 44-ാം ദിവസം’ എന്ന ബാഡ്ജായിരുന്നു അഖില ധരിച്ചത്.
