അബുദാബി : നടന് ദുല്ഖര് സല്മാന് യുഎഇ ഗോള്ഡന് വിസ സ്വീകരിച്ചു. അബുദാബി സാംസ്കാരിക-വിനോദ സഞ്ചാര വകുപ്പാണ് ദുല്ഖര് സല്മാന് ഗോള്ഡന് വിസ നല്കിയത്. ലുലു ഗ്രൂപ്പ് ചെയര്മാന് എം എ യൂസഫലിയാണ് ദുല്ഖറിന്റെ ഗോള്ഡന് വിസ നടപടിക്രമങ്ങള് പൂര്ത്തിയാക്കിയത്.
ആസ്ഥാന മന്ദിരത്തില് നടന്ന ചടങ്ങില് അബുദാബി കള്ചര് ആന്ഡ് ടൂറിസം സെക്രട്ടറി സഊദ് അബ്ദുല് അസീസ് അല് ഹൊസനി ദുല്ഖറിന് ഗോള്ഡന് വിസ സമ്മാനിച്ചു. പത്ത് വര്ഷം കാലാവധിയാണ് ഗോള്ഡന് വിസക്കുള്ളത്.
വിവിധ മേഖലകളില് കഴിവ് തെളിയിക്കുന്ന പ്രതിഭകള്ക്ക് ആദരമായി യു.എ.ഇ സര്ക്കാര് നല്കുന്നതാണ് ഗോള്ഡന് വിസ. മമ്മൂട്ടിക്കും മോഹന്ലാലിനും പിന്നാലെ പൃഥ്വിരാജ്, ടൊവിനോ, മിഥുന്, നൈല ഉഷ തുടങ്ങിയ താരങ്ങളും ഗോള്ഡന് വിസ സ്വീകരിച്ചിരുന്നു.