പത്തനംതിട്ട : ഓണ്ലൈന് വിദ്യാഭ്യാസത്തിന്റെ ഭാഗമായി കുട്ടികള്ക്ക് പഠനസൗകര്യം ഒരുക്കുന്നതിനായി ടെലിവിഷന് വാങ്ങുന്നതിനുള്ള സാമ്പത്തിക സഹായം നല്കണമെന്ന് ചില പൊതുമേഖലാ സ്ഥാപനങ്ങള് അറിയിക്കുകയും ചുമതല സമഗ്രശിക്ഷാ കേരളയെ ഏല്പ്പിക്കുകയും ചെയ്തിട്ടുണ്ട്. പഠന സംവിധാനം ഇനിയും ലഭ്യമല്ലാത്ത മേഖലകളിലുള്ള കുട്ടികള്ക്കുവേണ്ടി പൊതു ഇടങ്ങളായ അംഗനവാടി, വായനശാലകള്, റിസോഴ്സ് സെന്ററുകള്, പ്രതിഭാ കേന്ദ്രങ്ങള് എന്നിവിടങ്ങളില് ഏതാനും ടി.വി ക്രമീകരിക്കാനുള്ള നടപടികള് സ്വീകരിച്ചുവരുന്നു.
സന്നദ്ധ സംഘടനകളും പൊതുപ്രവര്ത്തകരും ജനപ്രതിനിധികളും ഓണ്ലൈന് ക്ലാസുകള് കാണാന് നടത്തുന്ന ക്രമീകരണങ്ങള് തുടര്ന്നും ഉണ്ടായാല് മാത്രമേ ജില്ലയിലെ കുട്ടികളുടെ പഠനം പൂര്ണ്ണമായി നടപ്പിലാക്കാന് കഴിയൂ. വ്യക്തിഗതമായി ടി.വി നല്കുന്നു എന്ന തരത്തില് വന്ന വാര്ത്ത തെറ്റാണെന്ന് സമഗ്രശിക്ഷാ കേരള പത്തനംതിട്ട ജില്ല പ്രോജക്ട് കോഡിനേറ്റര് കെ.വി അനില് അറിയിച്ചു.
