മലപ്പുറം : പ്രമുഖ പണ്ഡിതനും സമസ്ത കേരള ജംഇയ്യത്തുല് ഉലമ ട്രഷററുമായ ചേലക്കാട് മുഹമ്മദ് മുസ്ലിയാര് (91) അന്തരിച്ചു. വാര്ധക്യ സഹജമായ അസുഖത്തെ തുടര്ന്ന് വീട്ടില് വിശ്രമജീവിതം നയിക്കുകയായിരുന്നു. മയ്യത്ത് നിസ്കാരം വൈകുന്നേരം നാലിന് ചേലക്കാട് ജുമുഅത്ത് പള്ളിയില് നടക്കും. 2004 മുതല് സമസ്ത കേരള ജംഇയ്യത്തുല് ഉലമാ കേന്ദ്ര മുശാവറയില് അംഗമായി പ്രവര്ത്തിച്ചുവരുന്ന അദ്ദേഹം സമസ്ത കോഴിക്കോട് ജില്ലാ പ്രസിഡന്റ് കൂടിയാണ്. ചേലക്കാട് കുളമുള്ളതില് അബ്ദുല്ല മുസ്ലിയാരുടേയും കുഞ്ഞാമിയുടെയും മകനായി 1932ല് ജനിച്ച മുഹമ്മദ് മുസ്ലിയാര് വിവിധ മഹല്ലുകളുടെ ഖാസിയുമാണ്.
വയനാട്ടിലെ വാളാട് ജുമുഅത്ത് പള്ളിയില് 45 കൊല്ലം ഖാസിയായി സേവനം ചെയ്ത തന്റെ പിതാവാണ് ആദ്യ ഗുരു. പിന്നീട് നാദാപുരം, പൂക്കോം, ചെമ്മങ്കടവ്, പൊടിയാട്, മേല്മുറി, വാഴക്കാട്, പാറക്കടവ് എന്നീ പള്ളി ദര്സുകളിലെ പഠനത്തിന് ശേഷം 1962ല് വെല്ലൂര് ബാഖിയാത്തില് നിന്നും മൗലവി ഫാളില് ബാഖവി ബിരുദം നേടി.
വെല്ലൂര് ബാഖിയാത്തില് നിന്നും ബിരുദം നേടിയ ശേഷം അണ്ടോണ, കൊളവല്ലൂര്, ഇരിക്കൂര്, കണ്ണാടിപ്പറമ്ബ്, പഴങ്ങാടി മാടായി, ചിയ്യൂര്, ചേലക്കാട് എന്നിവിടങ്ങളിലും 11 വര്ഷം പട്ടിക്കാട് ജാമിഅഃ നൂരിയ്യ അറബിക് കോളേജിലും ഏഴ് വര്ഷം നന്തി ദാറുസ്സലാം അറബിക് കോളേജിലും ആറു വര്ഷം മടവൂര് സി.എം മഖാം അശ്അരി കോളേജിലും മുദരിസായി സേവനം ചെയ്തിട്ടുണ്ട്.
