കാലടി : ശ്രീ ശങ്കരാചാര്യ സംസ്കൃത സർവ്വകലാശാലയിലെ ശങ്കരജയന്തി ആഘോഷങ്ങളോടനുബന്ധിച്ച് സംഘടിപ്പിക്കുന്ന ശ്രീ ശങ്കര വാർഷിക പ്രഭാഷണം മെയ് അഞ്ചിന് രാവിലെ 10.30ന് മുംബൈ ടാറ്റാ ഇൻസ്റ്റിറ്റ്യൂട്ട് ഓഫ് ഫണ്ടമെന്റൽ റിസർച്ചിലെ ഫിസിക്സ് വിഭാഗം മുൻ പ്രൊഫസർ പ്രൊഫ.പി.പി ദിവാകരൻ കാലടി മുഖ്യക്യാമ്പസിലെ യൂട്ടിലിറ്റി സെന്ററിലുള്ള സെമിനാർ ഹാളിൽ നിര്‍വ്വഹിക്കുമെന്ന് സർവ്വകലാശാല അറിയിച്ചു. ‘ഭാരതത്തിന്റെ സാംസ്കാരിക തനിമയുടെ രൂപീകരണത്തിൽ ഗണിതശാസ്ത്രത്തിന്റെ സ്ഥാനം’ എന്നതാണ് പ്രഭാഷണ വിഷയം. രാവിലെ 10.15ന് സർവ്വകലാശാല ഭരണവിഭാഗം കാര്യാലയത്തിലെ ശ്രീ ശങ്കര പ്രതിമയ്ക്ക് മുന്നിൽ നടക്കുന്ന ശ്രദ്ധാഞ്ജലിയോടെ സര്‍വ്വകലാശാലയിലെ ശങ്കരജയന്തി ആഘോഷങ്ങൾ ആരംഭിക്കും.
തുടര്‍ന്ന്‍ സംഗീത വിഭാഗം വിദ്യാർത്ഥികൾ അവതരിപ്പിക്കുന്ന സംഗീതാർച്ചന യൂട്ടിലിറ്റി സെന്ററിലെ സെമിനാർ ഹാളിൽ നടക്കും. ശ്രീ ശങ്കര വാർഷിക പ്രഭാഷണത്തില്‍ വൈസ് ചാൻസലർ ഡോ.എം.വി നാരായണൻ ആമുഖ പ്രഭാഷണം നടത്തും. ശാസ്ത്രസംവർദ്ധിനി കേന്ദ്രം ഓണററി ഡയറക്ടർ പ്രൊഫ.വി.രാമകൃഷ്ണ ഭട്ട് എൻഡോവ്മെന്റുകൾ വിതരണം ചെയ്യും. രജിസ്ട്രാർ ഡോ.എം.ബി ഗോപാലകൃഷ്ണൻ, ശങ്കരജയന്തി ആഘോഷ കമ്മിറ്റി കൺവീനർ ഡോ.വി.കെ ഭവാനി എന്നിവർ പ്രസംഗിക്കും. ഉച്ചകഴിഞ്ഞ് 2.30ന് യൂട്ടിലിറ്റി സെന്ററിലെ സെമിനാർ ഹാളിൽ എം.എഫ്.എ വിദ്യാർത്ഥികളുടെ ചിത്രകലാ പ്രദർശനവും വൈകിട്ട് നാലിന് ഭരതനാട്യം, മോഹിനിയാട്ടം വിഭാഗങ്ങളുടെ നൃത്താവതരണവും നടക്കും.
