തിരുവനന്തപുരം : സ്വര്‍ണക്കടത്ത് വിവാദത്തില്‍ സ്വപ്ന സുരേഷിന്റെ വെളിപ്പെടുത്തലുകള്‍ക്ക് പിന്നില്‍ വ്യക്തമായ ഗൂഢാലോചനയുണ്ടെന്ന് സോളാര്‍ കേസ് പ്രതി സരിത നായര്‍. ഗൂഢാലോചന നടത്തിയത് അന്താരാഷ്ട്ര ശാഖകളുള്ള തിമിംഗലങ്ങളാണെന്ന് സരിത പറഞ്ഞു. കോടതിയില്‍ രഹസ്യ മൊഴി നല്‍കിയ ശേഷം മാദ്ധ്യമങ്ങളോട് പ്രതികരിക്കുകയായിരുന്നു അവര്‍.
ഗൂഢാലോചനയ്ക്ക് പിന്നില്‍ പി.സി. ജോര്‍ജ്, സ്വപ്ന, ക്രൈം നന്ദകുമാര്‍, ചില രാഷ്ട്രീയക്കാര്‍ എന്നിവരാണ്. പി.സി. ജോര്‍ജിനെ ആരെങ്കിലും യൂസ് ചെയ്തതാണോയെന്ന് അന്വേഷിച്ചാലേ മനസിലാകൂ. ഗൂഢാലോചനയ്ക്ക് പിന്നിലെ സൂത്രധാരന്‍ പി.സി. ജോര്‍ജ് അല്ല. അദ്ദേഹത്തിന് പിന്നില്‍ നമ്മള്‍ കാണാത്ത വലിയ തിമിംഗിലങ്ങളുണ്ട്. തന്നെ സമീപിച്ചത് പി.സി. ജോര്‍ജാണ്. അന്താരാഷ്ട്ര ശാഖകള്‍ വരെയുള്ള സംഘമാണ് ഇതിനെല്ലാം പിന്നില്‍. രാജ്യദ്രോഹമാണെങ്കിലും സപ്പോര്‍ട്ട് ചെയ്യാന്‍ ആളുണ്ടെന്നും സരിത പറഞ്ഞു. സ്വപ്നയുടെ ആരോപണം രാഷ്ട്രീയ പ്രേരിതം എന്നതിലുപരി നിലനില്‍പ്പിന്റെ കാര്യം കൂടിയാണെന്നും സരിത വ്യക്തമാക്കി. സ്വ‌പ്നയെ ഇ.ഡി രണ്ടാംദിവസവും ചോദ്യം ചെയ്യുകയാണ്. കൊച്ചിയിലാണ് ചോദ്യം ചെയ്യല്‍. ആരോഗ്യപ്രശ്നങ്ങള്‍ കാരണം ഇന്നലെ അഞ്ചര മണിക്കൂര്‍ മാത്രമാണ് ചോദ്യം ചെയ്യാന്‍ കഴിഞ്ഞത്.
