തിരുവനന്തപുരം: തൊഴില് തട്ടിപ്പ് കേസിലെ പ്രതി സരിത എസ് നായരുടേതെന്ന് കരുതുന്ന ശബ്ദ രേഖ പുറത്ത്. പരാതിക്കാരനായ അരുണിനോടുള്ള സരിതയുടെ സംഭാഷണമാണ് പുറത്തുവന്നത്. ആരോഗ്യകേരളം പദ്ധതിയില് നാല് പേര്ക്ക് ജോലി വാങ്ങി നല്കിയെന്ന് സരിത ശബ്ദ രേഖയില് പറയുന്നു.
പിന്വാതില് നിയമനത്തിന് പിന്നില് ഉദ്യോഗസ്ഥര്ക്കും രാഷ്ട്രീയക്കാര്ക്കും പങ്കുണ്ടെന്ന് സരിത പറയുന്നത് ശബ്ദരേഖയില് വ്യക്തമാണ്. ബെവ്കോ- കെടിഡിസി എന്നീ പൊതു മേഖലാ സ്ഥാപനങ്ങളില് ജോലി വാഗ്ദാനം ചെയ്ത് ഇടനിലക്കാര് മുഖേന ലക്ഷങ്ങള് കൈപ്പറ്റിയെന്നാണ് സരിതയ്ക്കെതിരെയുള്ള പരാതി.
ബെവ്കോയില് സ്റ്റോര് അസിസ്റ്റന്റായി നിയമനം നല്കാമെന്ന് പറഞ്ഞ് സരിതയും കൂട്ടരും പതിനൊന്നര ലക്ഷം രൂപ തട്ടിയെന്ന് നെയ്യാറ്റിന്കര സ്വദേശി അരുണ് ആരോപിച്ചിരുന്നു. ബെവ്കോയിലെ ഒരു ഉദ്യോഗസ്ഥയ്ക്കും ഇടപാടില് ബന്ധമുണ്ടെന്ന പരാതിക്കാര് ആരോപണം ഉന്നയിച്ചിരുന്നു.
