പത്തനംതിട്ട : സാമൂഹ്യപരിഷ്കര്‍ത്താവ് ഭരണാധികാരി എന്നീ നിലകളില്‍ കേരളത്തിന്‍റെ സാമൂഹ്യമാറ്റത്തിന് നേതൃത്വം നല്‍കിയ പ്രതിഭാധനനായ നേതാവായിരുന്നു മുന്‍ മുഖ്യമന്ത്രിയും കെ.പി.സി.സി പ്രസിഡന്‍റുമായിരുന്ന ആര്‍. ശങ്കര്‍ എന്ന് ഡി.സി.സി പ്രസിഡന്‍റ് പ്രൊഫ. സതീഷ് കൊച്ചുപറമ്പില്‍ പറഞ്ഞു. ആര്‍. ശങ്കറിന്‍റെ അന്‍പതാം ചരമവാര്‍ഷികത്തോടനുബന്ധിച്ച് ജില്ലാ കോണ്‍ഗ്രസ് കമ്മിറ്റിയുടെ നേതൃത്വത്തില്‍ സംഘടിപ്പിച്ച അനുസ്മരണ യോഗം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
രാജവാഴ്ച്ചക്കും ബ്രിട്ടീഷ് മേല്‍ക്കോയ്മക്കും എതിരായ സമരത്തില്‍ പങ്കെടുത്ത് ജയില്‍ വാസം അനുഷ്ടിച്ച അദ്ദേഹം ഇന്ത്യന്‍ സ്വാതന്ത്ര്യ സമരത്തിലെ മുന്നണിപ്പോരാളിയായിരുന്നുവെന്ന് ഡി.സി.സി പ്രസിഡന്‍റ് പറഞ്ഞു. കേരള ജനതയ്ക്കും കോണ്‍ഗ്രസ് പ്രസ്ഥാനത്തിനും ആര്‍. ശങ്കര്‍ നല്‍കിയ സംഭാവനകള്‍ എന്നും സ്മരിക്കപ്പെടുമെന്ന് അദ്ദേഹം പറഞ്ഞു.
ഡി.സി.സി വൈസ് പ്രസിഡന്‍റ് എ. സുരേഷ് കുമാര്‍ അദ്ധ്യക്ഷത വഹിച്ചു. യു.ഡി.എഫ് ജില്ലാ കണ്‍വീനര്‍ എ. ഷംസുദ്ദീന്‍, കെപി.സി.സി നിര്‍വ്വാഹക സമിതി അംഗം ജോര്‍ജ്ജ് മാമ്മന്‍ കൊണ്ടൂര്‍, ഡി.സി.സി ഭാരവാഹികളായ വെട്ടൂര്‍ ജ്യോതിപ്രസാദ്, സാമുവല്‍ കിഴക്കുപുറം, സുനില്‍. എസ്. ലാല്‍, സജി കൊട്ടയ്ക്കാട്, കെ. ജാസിംകുട്ടി, എം.എസ് സിജു, കെ.ജി അനിത, എലിസബത്ത് അബു, ബ്ലോക്ക് പ്രസിഡന്‍റ് അബ്ദുള്‍കലാം ആസാദ്, മണ്ഡലം പ്രസിഡന്‍റ് റനീസ് മുഹമ്മദ്, സജി. കെ. സൈമണ്‍, നാസര്‍ തോണ്ടമണ്ണില്‍, അജിത് മണ്ണില്‍, ഷാനവാസ് പെരിങ്ങമല എന്നിവര്‍ പ്രസംഗിച്ചു.
