തുറൈഫ് : സൗദിയുടെ വടക്കന് അതിര്ത്തി മേഖലയില് പെടുന്ന തുറൈഫ് പട്ടണത്തില് തിങ്കളാഴ്ച ഉണ്ടായ റോഡപകടത്തില് രണ്ട് പ്രവാസി തൊഴിലാളികള് മരിക്കുകയും 21 പേര്ക്ക് പരിക്കേല്ക്കുകയും ചെയ്തു. ഒരു മലയാളി ഉള്പ്പെടെ ഇന്ത്യന് തൊഴിലാളികളാണ് മരിച്ച രണ്ടു പേരും. തിരുവനന്തപുരം ആനയറ സ്വദേശിയും വാദിദവാസിറിലെ ഒരു സ്വകാര്യ കമ്പനിയില് ഇരുപത് വര്ഷങ്ങളായി സ്റ്റോര് കീപ്പര് ജോലി ചെയ്തുവരികയുമായിരുന്ന ചന്ദ്രശേഖരന് നായര് (55) ആണ് മരിച്ച മലയാളി.
മരിച്ച മറ്റൊരാള് ഉത്തര്പ്രദേശില് നിന്നുള്ള തൊഴിലാളിയാണ്. രണ്ടു പേരും തല്ക്ഷണം മരിക്കുകയായിരുന്നു. മൃതദേഹങ്ങള് തുറൈഫ് ജനറല് ആശുപത്രി മോര്ച്ചറിയിലാണ് സൂക്ഷിച്ചിരിക്കുന്നത്. ചന്ദ്രശേഖരന് നായര്ക്ക് നാട്ടില് ഭാര്യയും രണ്ടു മക്കളുമുണ്ട്. ഏതാനും മാസം മുമ്പാണ് അവധി കഴിഞ്ഞ നാട്ടില്നിന്ന് തിരിച്ചെത്തിയത്. നാട്ടിലെ ഉറ്റവരുടെ അഭ്യര്ത്ഥപ്രകാരം ചന്ദ്രശേഖരന് നായരുടെ മൃതദേഹ നാട്ടിലെത്തിക്കാനുള്ള പ്രവര്ത്തനങ്ങള് തുടങ്ങിയതായി പ്രദേശത്തെ സാമൂഹ്യ പ്രവര്ത്തകര് വിവരിച്ചു.
