സൗദി അറേബ്യ : സൗദി അറേബ്യയിലെ വിവിധ ഭാഗങ്ങളിൽ അടുത്ത ദിവസങ്ങളിൽ ശക്തമായ മഴയ്ക്കും ഇടിമിന്നലിനും സാധ്യത. ഇന്ന് മുതൽ 9 ബുധനാഴ്ച വരെ മഴ തുടരുമെന്നാണ് ദേശീയ കാലാവസ്ഥാ കേന്ദ്രത്തിന്റെ മുന്നറിയിപ്പ്. ചില പ്രദേശങ്ങളിൽ മഴയ്ക്കൊപ്പം ശക്തമായ കാറ്റിനും ഇടിമിന്നലിനും സാധ്യതയുള്ളതിനാൽ ജാഗ്രത പാലിക്കണമെന്ന് അധികൃതർ അറിയിച്ചു. ജിസാൻ, അസീർ, അൽബാഹ പ്രവിശ്യകളിലും മക്ക പ്രവിശ്യയിലെ ഉയർന്ന പ്രദേശങ്ങളിലുമാണ് ഇടത്തരം മുതൽ കനത്ത മഴ വരെ പ്രതീക്ഷിക്കുന്നത്. തിങ്കൾ, ചൊവ്വ ദിവസങ്ങളിൽ ജിസാൻ, അസീർ മേഖലകളിൽ മഴ കൂടുതൽ ശക്തമാകാനും സാധ്യതയുണ്ട്.
ജിസാൻ പ്രവിശ്യയിലെ അൽറൈത്ത്, ഹുറൂബ്, ഫൈഫ, ആരിദ, ബേശ്, അബൂഅരീശ്, സ്വാംത തുടങ്ങിയ പ്രദേശങ്ങളിലും ജിസാൻ നഗരത്തിലും ഫറസാൻ ദ്വീപുകളിലും ശക്തമായ മഴ ലഭിച്ചേക്കും. അസീർ പ്രവിശ്യയിലെ അബഹ, ഖമീസ് മുശൈത്ത്, അൽനമാസ്, തന്നൂമ, മഹായിൽ അസീർ തുടങ്ങിയ പ്രദേശങ്ങളിലും തിങ്കൾ, ചൊവ്വ ദിവസങ്ങളിൽ ശക്തമായ മഴയ്ക്ക് സാധ്യതയുണ്ട്.
