എറണാകുളം: കേരള ഫിഷറീസ് ആന്ഡ് സമുദ്ര പഠന സര്വകലാശാല(കുഫോസ്) വിസി നിയമനം റദ്ദാക്കിയതിനെതിരെ മുന് വൈസ് ചാന്സലര് സുപ്രീംകോടതിയില്. നിയമനം റദ്ദാക്കിയ ഹൈക്കോടതി ഉത്തരവ് റദ്ദാക്കണമെന്നാണ് ആവശ്യം. മുന് വിസി ഡോ. കെ റിജി ജോണ് ആണ് ഹൈക്കോടതി ഡിവിഷന് ബെഞ്ചിന്റെ ഉത്തരവിനെതിരെ സുപ്രീംകോടതിയെ സമീപിച്ചത്. ഹര്ജി നവംബര് 25 ന് ഹര്ജി കോടതി പരിഗണിക്കും.
വിസിയെ നിയമനം യുജിസി ചട്ടപ്രകാരമല്ലെന്നും നിയമനം റദ്ദാക്കണമെന്നും ചൂണ്ടിക്കാട്ടി എറണാകുളം സ്വദേശികള് സമര്പ്പിച്ച ഹര്ജികളിലായിരുന്നു ഹൈക്കോടതി നിലപാടെടുത്തത്. നിയമനം റദ്ദാക്കിയതിനൊപ്പം പുതിയ സെര്ച്ച് കമ്മിറ്റി രൂപീകരിച്ച് വിസി നിയമനം നടത്താനും ഹൈക്കോടതി നിര്ദ്ദേശം നല്കി. തമിഴ്നാട് ഫിഷറീസ് സര്വകലാശാലയില് നിന്ന് കുഫോസിലേക്ക് ഡീന് ആയി എത്തുകയായിരുന്നു ഡോ റിജി. അപേക്ഷ നല്കിയത് പിഎച്ച്ഡി ചെയ്യാന് പോയ മൂന്നു വര്ഷം കൂടി പ്രവൃത്തി പരിചയത്തിലുള്പ്പെടുത്തിയാണെന്ന് ഹര്ജിയില് പറയുന്നു. കൂടാതെ സെര്ച്ച് കമ്മറ്റി വിസി പദവിയിലേക്ക് ഒറ്റപ്പേര് മാത്രമാണ് ശുപാര്ശ ചെയ്യപ്പെട്ടതെന്നും ഹര്ജിക്കാര് കോടതിയില് ആരോപിച്ചു. സെര്ച്ച് കമ്മിറ്റി അംഗങ്ങളുടെ യോഗ്യത സംബന്ധിച്ചും ഇവര് പരാതി ഉയര്ത്തിയിരുന്നു.
