ചണ്ഡീഗഢ്: ഹരിയാണയില് സ്കൂള് ബസ് അപകടത്തില് ആറ് വിദ്യാര്ഥികള് മരിക്കുകയും 20 വിദ്യാര്ഥികള്ക്ക് പരിക്കേല്ക്കുകയും ചെയ്ത സംഭവത്തില് സ്വകാര്യ സ്കൂളിന്റെ പ്രിന്സിപ്പലിനെ പോലീസ് അറസ്റ്റ് ചെയ്തു. ഈദുല്-ഫിത്ര് ദിനത്തില് തുറന്നു പ്രവര്ത്തിച്ചതില് സ്കൂളിന് കാരണം കാണിക്കല് നോട്ടീസ് നല്കിയതായി ഹരിയാണ വിദ്യാഭ്യാസമന്ത്രി സീമ ത്രിഖ അറിയിച്ചു. വ്യാഴാഴ്ചയാണ് മഹേന്ദ്ഗഢില് അപകടമുണ്ടായത്. ജി.എല്. പബ്ലിക് സ്കൂളിന്റെ ബസാണ് അപകടത്തില്പ്പെട്ടത്. വീടുകളില്നിന്ന് കുട്ടികളെ സ്കൂളിലേക്ക് കൊണ്ടുവരുന്നതിനിടെ മറ്റൊരു വാഹനത്തെ മറികടക്കുമ്പോഴായിരുന്നു അപകടം. ബസ് കീഴ്മേല് മറിഞ്ഞ് അപകടം ഉണ്ടായത്.
ഈദുല്-ഫിത്ര് ദിനത്തില് സംസ്ഥാനത്തെ എല്ലാ സ്കൂളുകള്ക്കും അവധിയാണെന്നും അപകടത്തില്പ്പെട്ട വിദ്യാര്ഥികള് പഠിക്കുന്ന സ്കൂളിന് കാരണം കാണിക്കല് നോട്ടീസ് നല്കിയതായും മന്ത്രി പറഞ്ഞു. കൂടാതെ, വിദ്യാര്ഥികളെ കൊണ്ടുവരുന്ന വാഹനങ്ങള് ട്രാഫിക് നിയമങ്ങളും പെരുമാറ്റച്ചട്ടങ്ങളും കൃത്യമായി പാലിക്കുന്നതായി സ്വകാര്യസ്കൂളുകളുടെ ഭാഗത്തുനിന്ന് സത്യവാങ്മൂലം തേടിയതായും അവര് പറഞ്ഞു.
