തൃശൂർ: വലിയ പെട്ടി നിറയെ ആയിരക്കണക്കിന്കത്തുകളുമായി ഒരു കൂട്ടം വിദ്യാർഥികൾ പോസ്റ്റ് ഓഫീസിൽ. കത്തെഴുത്തുദിനവും അധ്യാപകദിനവും അടുത്തടുത്തു വന്നതോടെ അധ്യാപകരെ കാണാത്തതിനാല് തപാൽ വഴി കത്തെഴുതാൻ കുട്ടികൾ തീരുമാനിച്ചു. അധ്യാപകർ, അനധ്യാപകർ, ആയമാർ, ഡ്രൈവർമാർ എല്ലാവർക്കുമായി എഴുതിയ കത്തുകള് ചിറ്റിലപ്പിള്ളി ഐഇഎസ് സ്കൂളിലെ വിദ്യാർഥികളാണു പുറനാട്ടുകര തപാൽ ഓഫീസിലെത്തിക്കുകയായിരുന്നു.
ആദ്യമായി കത്ത് പോസ്റ്റ് ചെയ്യുന്ന കുട്ടികളെ കണ്ടതോടെ തപാല് ഓഫീസും അത് ആഘോഷിച്ചു. തപാൽ ഓഫീസിലെ എടിഎം, ആധാർ കാർഡ് എടുക്കൽ സൗകര്യങ്ങളെക്കുറിച്ചും മറ്റും ബോധവൽക്കരിച്ചു. പ്രിൻസിപ്പൽ സുജാത ഹരിമോഹൻ, അധ്യാപകരായ ഇ.എസ്. ജോസി, ഉഷ റാണി എന്നിവരുടെ നേതൃത്വത്തിൽ എത്തിയ കുട്ടികളെ സ്വീകരിക്കാൻ തപാൽ ഇൻസ്പെക്ടർ പി.എസ്. രമേഷ്, പോസ്റ്റ് മാസ്റ്റർ സ്റ്റെഫി ഫ്രാൻസിസ് എന്നിവരുമുണ്ടായിരുന്നു.
