തിരുവനന്തപുരം : സ്കൂള് വിനോദയാത്രകള്ക്കുള്ള മാനദണ്ഡങ്ങള് പുതുക്കി ഉത്തരവിറക്കി. പൊതു വിദ്യാഭ്യാസ ഡയറക്ടര് ആണ് ഉത്തരവിറക്കിയത്. ഗതാഗതവകുപ്പ് നിര്ദേശിക്കുന്ന മാനദണ്ഡങ്ങള് പാലിക്കുന്ന വാഹനങ്ങള് മാത്രമെ ഉപയോഗിക്കാവൂ. വാഹനങ്ങളുടെ രേഖകള് സ്കൂള് അധികൃതര് പരിശോധിച്ച് ഉറപ്പാക്കണം. നിയമവിരുദ്ധമായ ലൈറ്റുകളും ശബ്ദസംവിധാനവുമുള്ള കോണ്ട്രാക്ട് ക്യാരേജുകള് ഉപയോഗിക്കരുത്. രാത്രി പത്തിനുശേഷവും രാവിലെ അഞ്ചിന് മുന്പും യാത്ര പാടില്ല. വിനോദ–പഠന യാത്രയ്ക്ക് മുന്പ് രക്ഷിതാക്കളുടെ യോഗം വിളിച്ച് സ്കൂള് അധികൃതര് വിശദാംശങ്ങള് അറിയിക്കണം. ഒരു അക്കാദമിക വര്ഷം മൂന്നുദിവസമേ വിനോദയാത്രക്കായി മാറ്റിവെക്കാവൂ.
പതിനഞ്ച് വിദ്യാര്ഥികള്ക്ക് ഒരുഅധ്യാപകനെന്ന അധ്യാപക, വിദ്യാര്ഥി അനുപാതം പാലിക്കണമെന്നും മാര്ഗരേഖ പറയുന്നു. വടക്കാഞ്ചേരിയില് സ്കൂള് വിദ്യാര്ത്ഥികള് വിനോദയാത്ര പോയ ബസ് അപകടത്തില്പ്പെട്ട് വീദ്യാര്ത്ഥികളും അധ്യാപകരും ഉള്പ്പടെ 9പേര് മരണപ്പെട്ടിരുന്നു. എറണാകുളം ജില്ലയിലെ കണയന്നൂര് താലൂക്കില് വെട്ടിക്കല് ബസേലിയസ് വിദ്യ നികേതനിലെ വിദ്യാര്ത്ഥികളും അധ്യാപകനും ആണ് അപകടത്തില് മരണപ്പെട്ടത്. യാത്ര പുറപ്പെട്ട ബസിനു ഗതാഗതവകുപ്പിന്റെ നിര്ദ്ദേശങ്ങള് അനുസരിച്ചുള്ള ഫിറ്റനസ് ഉണ്ടായിരുന്നില്ല.ബസിന്റെ അമിത വേഗതയാണ് അപകടത്തിനിടയാക്കിയത്. കെഎസ്ആര്ടിസി ബസ്സിന്റെ പിന്നില് ഇടിച്ചുകയറുകയാണ് അപകടം ഉണ്ടായത്.
