ഡല്ഹി: കോൺഗ്രസ് അധ്യക്ഷനായി തിരഞ്ഞെടുക്കപ്പെട്ട കോൺഗ്രസ് നേതാവ് മല്ലികാർജുൻ ഖാർഗെക്ക് പ്രധാനമന്ത്രി നരേന്ദ്ര മോദി ആശംസകൾ നേർന്നു. “ഐഎൻസിയുടെ പ്രസിഡണ്ട് എന്ന നിലയിലുള്ള പുതിയ ഉത്തരവാദിത്തത്തിന് ശ്രീ മല്ലികാർജുൻ ഖാർഗെ ജിക്ക് എന്റെ ആശംസകൾ. അദ്ദേഹത്തിന് ഫലവത്തായ ഒരു ഭരണകാലം ഉണ്ടാവട്ടെ” പ്രധാനമന്ത്രി ട്വിറ്ററിൽ കുറിച്ചു.
കർണാടകയിൽ നിന്നുള്ള ഗാന്ധി കുടുംബത്തിന്റെ വിശ്വസ്തനായ ഖാർഗെ, പ്രസിഡന്റ് തിരഞ്ഞെടുപ്പിൽ 84 ശതമാനം വോട്ടുകൾ നേടി ശശി തരൂരിനെയാണ് പരാജയപ്പെടുത്തിയത്. ഖാർഗെക്ക് 7897 വോട്ടും തരൂരിന് 1072 വോട്ടും ലഭിച്ചു. 416 വോട്ടുകൾ അസാധുവായതായി കോൺഗ്രസ് കേന്ദ്ര തിരഞ്ഞെടുപ്പ് അതോറിറ്റി ചെയർമാൻ മധുസൂദൻ മിസ്ത്രി എഐസിസി ആസ്ഥാനത്ത് നടത്തിയ വാർത്താ സമ്മേളനത്തിൽ പറഞ്ഞു.
“ആരും വലുതോ ചെറുതോ അല്ല, കോൺഗ്രസിനെ ശക്തിപ്പെടുത്താൻ എല്ലാവരും ഒരുമിച്ച് പ്രവർത്തിക്കണം. ജനാധിപത്യത്തെയും ഭരണഘടനയെയും ആക്രമിക്കുന്ന ഫാസിസ്റ്റ് ശക്തികൾക്കെതിരെ നമുക്ക് ഒരുമിച്ച് പോരാടണം” തിരഞ്ഞെടുപ്പ് ജയത്തിന് ശേഷം ഖാർഗെ മാദ്ധ്യമങ്ങളോട് പ്രതികരിച്ചു. ഒക്ടോബർ 26നാണ് ഖാർഗെ ഔദ്യോഗികമായി ചുമതല ഏറ്റെടുക്കുക.
