തിരുവനന്തപുരം : സ്കൂളുകള് പൂര്ണതോതില് പ്രവര്ത്തിക്കാന് തീരുമാനിച്ച സാഹചര്യത്തില് ഇതിനുള്ള പുതിയ മാര്ഗരേഖ ഫെബ്രുവരി 12ന് പുറത്തിറക്കുമെന്ന് പൊതു വിദ്യാഭ്യാസ മന്ത്രി വി.ശിവന്കുട്ടി. വിശദമായ മാര്ഗ്ഗരേഖയാകും പുറത്തിറക്കുകയെന്നും പാഠഭാഗങ്ങള് പഠിപ്പിച്ചു തീര്ക്കുന്നതിനാണ് മുന്തിയ പരിഗണനയെന്നും അധ്യയന വര്ഷം നീട്ടില്ലെന്നും മന്ത്രി വ്യക്തമാക്കി.
പരീക്ഷയും വേനലവധിയും കൃത്യ സമയത്ത് ഉണ്ടാകുമെന്നും ഫോക്കസ് ഏരിയ പരിഷ്കരിക്കുമെന്നും അദ്ദേഹം അറിയിച്ചു. സോഷ്യല് മീഡിയ പോരാളികള് വിദ്യാര്ഥികളെ കുഴപ്പത്തിലാക്കരുതെന്ന് അദ്ദേഹം അപേക്ഷിച്ചു. വിദ്യാഭ്യാസ നയം തീരുമാനിക്കാനുള്ള അവകാശം അധ്യാപക സംഘനകള്ക്കല്ലെന്നും അവര് തങ്ങളുടെ ജോലി ചെയ്യുകയാണ് വേണ്ടതെന്നും മന്ത്രി ചൂണ്ടിക്കാട്ടി. ഏറ്റവും കൂടുതല് സംഘടനയുള്ള ഡിപ്പാര്ട്ട്മെന്റാണ് വിദ്യാഭ്യാസവകുപ്പെന്നതിനാല് എല്ലാവരുടെയും നിര്ദേശം കണക്കിലെടുക്കാനാവില്ലെന്ന് മന്ത്രി പറഞ്ഞു.
