തിരുവല്ല : തിരുവല്ല ബൈപ്പാസില് കാര് സ്കൂട്ടറിലിടിച്ചുണ്ടായ അപകടത്തില് സ്കൂട്ടര് യാത്രികന് പരിക്കേറ്റു. തിരുവല്ല നഗരത്തില് പൂക്കട നടത്തുന്ന ചങ്ങനാശ്ശേരി കുന്നുംപുറം സ്വദേശി ജോയി (58) നാണ് പരിക്കേറ്റത്. ബൈപ്പാസിലെ പുഷ്പഗിരി ജംങ്ഷനില് ഇന്ന് രാവിലെ 11 മണിയോടെ ആയിരുന്നു അപകടം. മഴുവങ്ങാട് ഭാഗത്ത് നിന്നും വന്ന കാര് പുഷ്പഗിരി റോഡില് നിന്നും ബൈപ്പാസിലേക്ക് പ്രവേശിച്ച സ്കൂട്ടറില് ഇടിക്കുകയായിരുന്നു. അപകടത്തില് തലക്കും കാലിനും സാരമായി പരിക്കേറ്റ ജോയിയെ തിരുവല്ല താലൂക്ക് ആശുപത്രിയില് പ്രവേശിപ്പിച്ചു. അപകടത്തില്പ്പെട്ട കാര് ഉച്ചയോടെ സംഭവ സ്ഥലത്ത് നിന്നും നീക്കം ചെയ്തു. തിരുവല്ല പോലീസ് കേസെടുത്തു.
