കോട്ടയം : ഈരാറ്റുപേട്ട നഗരസഭയിലെ യു.ഡി.എഫിനെതിരായ ഇടതു മുന്നണി അവതരിപ്പിച്ച അവിശ്വാസപ്രമേയം എസ്.ഡി.പി.ഐ പിന്തുണയില് പാസായതു വിവാദമായതിനെത്തുടര്ന്ന് വിശദീകരണവുമായി സി.പിഎം രംഗത്ത്. ഇടതുപക്ഷം എസ്.ഡി.പി.ഐയോടു പിന്തുണ ചോദിച്ചിട്ടില്ലെന്ന് മന്ത്രി വി.എന് വാസവന് പ്രതികരിച്ചു. ഇനി അവരുമായി ചേര്ന്നു നഗരസഭയില് ഭരണം നടത്താനും ഇടതുപക്ഷം തയാറല്ലെന്നും അദ്ദേഹം പറഞ്ഞു.
വിവാദമാക്കി യുഡിഎഫ്
എസ്.ഡി.പി.ഐ പിന്തുണയോടെ ഭരണം വീഴ്ത്തിയതിനെതിരേ രൂക്ഷപ്രതികരണവുമായി യു.ഡി.എഫ് രംഗത്തുവന്നിട്ടുണ്ട്. സി.പി.എം-എസ്.ഡി.പി.ഐ കൂട്ടുകെട്ടാണ് ഈരാറ്റുപേട്ടയില് കണ്ടതെന്നാണ് യു.ഡി.എഫ് ആരോപിക്കുന്നത്. പ്രതിപക്ഷ നേതാവ് വി.ഡി സതീശന് തന്നെ ആരോപണവുമായി ഇന്നു രംഗത്തുവന്നു. ഈരാറ്റുപേട്ട നഗരസഭയില് യു.ഡി.എഫ് ചെയര്പേഴ്സണ് സുഹറ അബ്ദുള് ഖാദറിനെതിരേ എല്.ഡി.എഫ് നല്കിയ അവിശ്വാസമാണ് എസ്.ഡി.പി.ഐയുടെ പിന്തുണയോടെ പാസായത്. 28 അംഗ നഗരസഭാ കൗണ്സിലില് കോണ്ഗ്രസില്നിന്നു കൂറുമാറിയ അന്സലന പരീക്കുട്ടിയുടേതടക്കം 15 വോട്ട് എല്ഡിഎഫിന് ലഭിച്ചു.
വെല്ഫയര് പാര്ട്ടിയുടെ അംഗങ്ങള് ഉള്പ്പെടെ 13 യു.ഡി.എഫ് അംഗങ്ങള് ചര്ച്ചയില് പങ്കെടുത്തെങ്കിലും വോട്ടെടുപ്പില്നിന്നു വിട്ടുനിന്നു. നഗരസഭാ കൗണ്സിലില് കോണ്ഗ്രസില്നിന്നു കൂറുമാറിയ അന്സലന പരീക്കുട്ടിയടക്കം എല്.ഡി.എഫിന് 10 അംഗങ്ങളാണുള്ളത്. യു.ഡി.എഫിന് 13 ഉം എസ്.ഡി.പി.ഐക്ക് അഞ്ച് അംഗങ്ങളുമുണ്ട്. യു.ഡി.എഫ് ഭരണസമിതിയുടെ വികസന മുരടിപ്പും സ്വജന പക്ഷപാതവും ചൂണ്ടിക്കാട്ടിയാണ് അവിശ്വാസം നല്കിയതെന്ന് എല്.ഡി.എഫ് പറഞ്ഞു. ഇന്നലെ രാവിലെ 11ന് കൗണ്സില് ഹാളില് ആരംഭിച്ച ചര്ച്ചകള്ക്ക് നഗരകാര്യ ജോയിന്റ് ഡയറക്ടര് ഹരികുമാര് റിട്ടേണിംഗ് ഓഫീസറായിരുന്നു.
നാടിന്റെ വികസനം തടസപ്പെടുത്താനാണ് എല്.ഡി.എഫ് അവിശ്വാസപ്രമേയം അവതരിപ്പിച്ചതെന്നും തെരഞ്ഞെടുപ്പില് രാഷ്ട്രീയ നേട്ടത്തിനായി ന്യൂനപക്ഷ വര്ഗീയതയെ പ്രീണിപ്പിക്കുന്ന ഇടതുമുന്നണിയുടെ നയം ജനാധിപത്യവിശ്വാസികള് തിരിച്ചറിയണമെന്നും യു.ഡി.എഫ് മണ്ഡലം ചെയര്മാന് പി.എച്ച് നൗഷാദ് പറഞ്ഞു. സി.പി.എം സംസ്ഥാന സമിതിയുടെ നിലപാടിനു വിരുദ്ധമായി യാതൊരു തീരുമാനവും എടുക്കില്ലെന്നും തുടര്നടപടികള് പാര്ട്ടിയുടെ നയത്തിന്റെ അടിസ്ഥാനത്തില് ചര്ച്ച ചെയ്ത് തീരുമാനമെടുക്കുമെന്നും സി.പി.എം പൂഞ്ഞാര് ഏരിയാ സെക്രട്ടറി കുര്യാക്കോസ് ജോസഫ് പറഞ്ഞു.
നഗരസഭാ ഭരണനേതൃത്വത്തിന്റെ വിവേചനപരവും ഏകാധിപത്യപരവുമായ നിലപാടുകള്ക്കെതിരായ നിലപാടാണ് ഇടതുപക്ഷം കൊണ്ടുവന്ന അവിശ്വാസ പ്രമേയത്തെ പിന്തുണയ്ക്കുന്നതിലൂടെ എസ്.ഡി.പി.ഐ കൈക്കൊണ്ടതെന്നു പാര്ട്ടി മുനിസിപ്പല് പ്രസിഡന്റ് സി.എച്ച് ഹസീബ് പറഞ്ഞു.
അവിശുദ്ധ കൂട്ടുകെട്ട്
ഈരാറ്റുപേട്ട നഗരസഭയില് അവിശ്വാസത്തെ പിന്തുണയ്ക്കുക വഴി എസ്.ഡി.പി.ഐ-സി.പി.എം അവിശുദ്ധ കൂട്ടുകെട്ടാണ് നടന്നതെന്നു ഡി.സി.സി പ്രസിഡന്റ് നാട്ടകം സുരേഷ് പറഞ്ഞു. എസ്.ഡി.പി.ഐ ബന്ധത്തില് സി.പി.എം നിലപാട് മാറ്റിയോ എന്നറിയാന് ജനത്തിന് ആഗ്രഹമുണ്ട്. അഭിമന്യുവിന്റെ കുടുംബത്തോടു സി.പി.എം മാപ്പുപറയണമെന്നും നാട്ടകം സുരേഷ് പറഞ്ഞു.