പേരൂർക്കട: സെക്രട്ടേറിയറ്റ് ജീവനക്കാരനെ മർദ്ദിച്ച യുവാവ് അറസ്റ്റിൽ. പേട്ട കവറടി സ്വദേശി പല്ലന് സജീവ് എന്നു വിളിക്കുന്ന സജീവ് (36) ആണ് അറസ്റ്റിലായത്. വഞ്ചിയൂർ പോലീസ് ആണ് അറസ്റ്റ് ചെയ്തത്. ഏപ്രിൽ 20-നു രാവിലെ 10 മണിയോടുകൂടി തമ്പാനൂർ ഉപ്പിടാംമൂട് പാലത്തിനു സമീപമായിരുന്നു സംഭവം. പ്രാവച്ചമ്പലം സ്വദേശി രാഹുലിനാണ് മർദ്ദനമേറ്റത്.
കാറിൽ വരികയായിരുന്ന രാഹുൽ അനാവശ്യമായി ഹോൺ മുഴക്കിയതിൽ പ്രകോപിതമായിട്ടായിരുന്നു മർദ്ദനം. പരാതിയുടെ അടിസ്ഥാനത്തിൽ വഞ്ചിയൂർ സിഐയുടെ നേതൃത്വത്തിലുള്ള സംഘമാണ് പ്രതിയെ കസ്റ്റഡിയിലെടുത്തത്. ഇയാളെ കോടതിയിൽ ഹാജരാക്കിയ ശേഷം റിമാൻഡ് ചെയ്തു.
