ന്യൂഡല്ഹി: രാജ്യത്തെ മുതിര്ന്ന പൗരന്മാര്ക്ക് നല്കിയ യാത്ര ഇളവുകള് പുനഃസ്ഥാപിക്കാനൊരുങ്ങി റെയില്വേ. ജനറല്, സ്ലീപ്പര് ക്ലാസ്സുകളില് മാത്രമായിരിക്കും മുതിര്ന്ന പൗരന്മാര്ക്ക് ഇളവുകള് നല്കുക എന്നാണ് റിപ്പോര്ട്ട്. കോവിഡ് മഹാമാരിക്ക് ശേഷമാണ് റെയില്വേ മുതിര്ന്ന പൗരന്മാര്ക്ക് നല്കിയിരുന്ന ഇളവുകള് നിര്ത്തലാക്കിയത്. വിവിധ കോണുകളില് നിന്നുയര്ന്ന വിമര്ശനങ്ങള്ക്കൊടുവിലാണ് ഇളവുകള് പുനഃസ്ഥാപിക്കാന് തീരുമാനം.
നേരത്തെ സ്ത്രീകളുടെ പ്രായം 58 നും പുരുഷന്മാരുടെ പ്രായം 60 നും മുകളിലാകണമായിരുന്നു. എന്നാല് ഇളവുകള് പുനഃസ്ഥാപിക്കുമ്പോള് പ്രായപരിധിയില് മാറ്റം വരുത്തും എന്ന് റെയില്വേ അറിയിച്ചു. 70 വയസ്സിന് മുകളിലുള്ളവര്ക്ക് ആയിരിക്കും ഇളവുകള് ലഭിക്കുക എന്നാണ് റിപ്പോര്ട്ട്. ഇളവുകള് പൂര്ണമായി ഒഴിവാക്കില്ല എന്ന് റെയില്വേ അറിയിച്ചിട്ടുണ്ട്. മുതിര്ന്ന പൗരന്മാരുടെ ഇളവിനുള്ള പ്രായപരിധിയില് മാറ്റം വരുത്തി 70 വയസ്സിനു മുകളിലുള്ളവര്ക്ക് മാത്രമായി നല്കുന്ന കാര്യം റെയില്വേ ബോര്ഡ് പരിഗണിക്കുന്നുണ്ടെന്ന് ഉദ്യോഗസ്ഥ വൃത്തങ്ങള് അറിയിച്ചു. ഇത് ബാധ്യത കുറയ്ക്കാന് ഉപകരിക്കുമെന്ന് അവര് വ്യക്തമാക്കി.
