തിരുവനന്തപുരം: തിരുവനന്തപുരം കാട്ടാക്കട ക്രിസ്ത്യന് കോളജിലെ എസ്എഫ്ഐ ആള്മാറാട്ടത്തില് തങ്ങള്ക്ക് പങ്കില്ലെന്ന് രണ്ട് എംഎല്എമാര് സിപിഎമ്മിന് കത്ത് നല്കി. കാട്ടാക്കട എംഎല്എ ഐബി സതീഷും അരുവിക്കര എംഎല്എ ജി സ്റ്റീഫനുമാണ് കത്ത് നല്കിയത്. പാര്ട്ടി നേതാക്കള് അറിയാതെ ആള്മാറാട്ടം നടക്കില്ലെന്ന് സിപിഎം ജില്ലാ കമ്മിറ്റിയില് വിമര്ശനം ഉയര്ന്നിരുന്നു. വിഷയത്തില് അന്വേഷണം വേണം. കോളജ് യൂണിയന് തെരഞ്ഞെടുപ്പില് ജയിച്ച സ്ഥാനാര്ത്ഥിയെ മാറ്റിയതില് തങ്ങള്ക്ക് പങ്കില്ലെന്നും കത്തില് വ്യക്തമാക്കുന്നു.
അതേസമയം സംഭവത്തില് ക്രിമിനല് കേസെടുക്കണമെന്നാവശ്യപ്പെട്ട് കേരള സര്വകലാശാല പോലീസ് മേധാവിക്ക് പരാതി നല്കി. അതേസമയം, കെഎസ്യു നല്കിയ പരാതി നിലനില്ക്കുമോ എന്ന സംശയത്തില് അഞ്ച് ദിവസമായിട്ടും പോലീസ് കേസെടുത്തിട്ടില്ല. തട്ടിപ്പ് അന്വേഷിക്കാന് കോളേജ് മാനേജ്മെന്റ് മൂന്നംഗ സമിതിയെ ചുമതലപ്പെടുത്തി. ഇന്നലെ ചേര്ന്ന സിണ്ടിക്കേറ്റ് യോഗ തീരുമാന പ്രകാരമാണ് കേരള സര്വകലാശാല രജിസ്ട്രാര് പോലീസില് പരാതി നല്കിയത്. എസ്എഫ്ഐ നേതാവായിരുന്ന എ വിശാഖിനും പ്രിന്സിപ്പലായിരുന്ന ജി ജെ ഷൈജുവിനുമെതിരെയാണ് പരാതി.
