പത്തനംതിട്ട : ശബരിമലയില് ആലങ്ങാട്ട് സംഘത്തിന്റെ മഹാനിവേദ്യമായ പന്തിരുനാഴി ഭഗവാന് നിവേദിച്ചു. ഇന്ന് രാവിലെയാണ് ചടങ്ങുകള് ആരംഭിച്ചത്. അരി, ശര്ക്കര, നാളീകേരം എന്നിവ ആലങ്ങാട്ട് സംഘത്തില് നിന്ന് ദേവസ്വം ഉദ്യോഗസ്ഥര് അളന്നെടുക്കുന്ന ചടങ്ങ് നടന്നു. തുടര്ന്ന് ആലങ്ങാട് സംഘത്തിന്റെ ഭഗവാനുള്ള നെയ്യഭിഷേകവും നടന്നു. ഉച്ചയ്ക്ക് തന്ത്രി കണ്ഠരര് മഹേശ്വരര് മോഹനരര് തിരുമുറ്റത്ത് പന്തിരുനാഴി ഭഗവാന് സമര്പ്പിച്ചു.
ഇവര് ഇരുമുടിക്കെട്ടില് കൊണ്ടുവന്ന അരി, ശര്ക്കര, നാളേകേരം എന്നിവ ഉയോഗിച്ചാണ് പന്തിരുനാഴി ഉണ്ടാക്കുന്നത്. ശബരിമലയില് രണ്ട് മഹാനിവേദ്യങ്ങളാണുള്ളത്. പിതൃസ്ഥാനീയരായ ആലങ്ങാട് സംഘത്തിന്റെ പന്തിരുനാഴിയും മാതൃസ്ഥാനീയരായ അമ്പലപ്പുഴ സംഘത്തിന്റെ എള്ളുപായസവും.
അമ്പലപ്പുഴ സംഘത്തിന്റെ മഹാനിവേദ്യം മകരവിളക്കിന് വിതരണം ചെയ്തിരുന്നു. രാജാവിനെ സ്വീകരിക്കുന്ന ചടങ്ങില് പങ്കെടുത്ത ശേഷം രാത്രി ഒന്നരക്കൂട്ട് അരവണയും മൂന്നുകൂട്ടം അപ്പവും തന്ത്രിയും മേല്ശാന്തിയും ചേര്ന്ന് ആലങ്ങാട് യോഗ പെരിയോര് എ കെ വിജയകുമാറിന് നല്കി. അത് സംഘങ്ങള് വിതരണം ചെയ്തു. നാളെ രാവിലെ സംഘം മലയിറങ്ങും.
