പത്തനംതിട്ട : പന്തളം രാജപ്രതിനിധി മൂലം തിരുനാള് ശങ്കര് വര്മയെ ഇന്ന് സന്നിധാനത്ത് ആചാരപ്രകാരം എതിരേറ്റു. തിരുവാഭണ ഘോഷയാത്രയ്ക്ക് അകമ്പടിയായി എത്തി പമ്പയില് തങ്ങിയിരുന്ന പ്രതിനിധി ഇന്നാണ് സന്നിധാനത്ത് എത്തിയത്. നീലിമലയും അപ്പാച്ചിമേടും കടന്ന് പല്ലക്കില് ശരംകുത്തിയിലെത്തിയ തമ്പുരാനെ ഘോഷയാത്രയായെത്തിയ ആലങ്ങാട്ടു സംഘം വരവേറ്റു. തുടര്ന്ന് ദേവസ്വം പ്രതിനിധി തിരുവാഭരണപേടകത്തില് കൊണ്ടുവന്ന ചുരിക നടപ്പന്തലില് സ്വീകരിച്ചു.
പതിനെട്ടാംപടിക്ക് താഴെ വെച്ച് കീഴ്ശാന്തി കാല്കഴുകിയ ശേഷം തമ്പുരാന് മേല്ശാന്തി നല്കിയ നാളീകേരം ഉടച്ച് പടികയറി. അയ്യപ്പനെ വണങ്ങി നിന്ന തമ്പുരാന് പ്രസാദം സ്വീകരിച്ച ശേഷം മേല്ശാന്തിക്ക് പണക്കിഴിയും മുണ്ടും നല്കി. 19 ന് ഗുരുതി കഴിഞ്ഞ് 20 ന് അയ്യപ്പദര്ശനം നടത്തുന്നത് വരെ തമ്പുരാന് മാളികപ്പുറത്തിന് സമീപം താമസിക്കും.
