ദുബായ് : എമിറേറ്റിലെ ഏറ്റവും പഴയ കെട്ടിടമായ അൽ ഫഹീദി കോട്ടയുടെ നവീകരണത്തിന്റെ അന്തിമ രൂപരേഖയ്ക്ക് ദുബായ് കിരീടാവകാശിയും എക്സിക്യുട്ടീവ് കൗൺസിൽ ചെയർമാനുമായ ശൈഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂം അംഗീകാരം നൽകി. രാജ്യത്തിന്റെ സാംസ്കാരിക പാരമ്പര്യം സംരക്ഷിക്കാനുള്ള സുപ്രധാന ചുവടുവെപ്പാണിത്.
അൽ ഫഹീദി കോട്ട പുനരധിവാസ പദ്ധതിയുടെ പുരോഗതിയും ശൈഖ് ഹംദാൻ അവലോകനം ചെയ്തു. ചരിത്ര സ്മാരകം പുനഃസ്ഥാപിക്കുന്നതിന് ദുബായ് കൾച്ചർ ആൻഡ് ആർട്ട്സ് അതോറിറ്റി ചെയർപേഴ്സണും ദുബായ് കൗൺസിൽ അംഗവുമായ ശൈഖ ലത്തീഫ ബിൻത് മുഹമ്മദ് ബിൻ റാഷിദ് അൽ മക്തൂമിന്റെ നേതൃത്വത്തിലുള്ള സംഘത്തിന് അദ്ദേഹം നന്ദിയറിയിച്ചു.
