ധാക്ക: രോഹിങ്ക്യന് അഭയാര്ത്ഥികള് ബംഗ്ലാദേശിന്റെ സമ്പദ്വ്യവസ്ഥയ്ക്കും പരിസ്ഥിതിക്കും സുരക്ഷയ്ക്കും രാജ്യത്തിന്റെ മുന്നോട്ടുള്ള വളര്ച്ചയിലും ഗുരുതരമായ പ്രത്യാഘാതങ്ങള് ഉണ്ടാക്കുന്നുണ്ടെന്ന് പ്രധാനമന്ത്രി ഷെയ്ഖ് ഹസീന. വിഷയത്തില് ഐക്യരാഷ്ട്രസഭ ഇടപെടണമെന്നും ഷെയ്ഖ് ഹസീന അഭ്യര്ത്ഥിച്ചു. യുഎന് ജനറല് അസംബ്ലിയുടെ 77-ാമത് സമ്മേളനത്തെ അഭിസംബോധന ചെയ്ത് സംസാരിക്കുകയായിരുന്നു ഹസീന.
‘ രോഹിങ്ക്യകളുടെ സാന്നിദ്ധ്യം ബംഗ്ലാദേശിന്റെ സമ്പദ്വ്യവസ്ഥയ്ക്കും പരിസ്ഥിതിക്കും സുരക്ഷയ്ക്കും സാമൂഹിക-രാഷ്ട്രീയ അന്തരീക്ഷത്തിനുമെല്ലാം ഗുരുതരമായ പ്രത്യാഘാതങ്ങള് ഉണ്ടാക്കുകയാണ്. മനുഷ്യക്കടത്ത്, മയക്കുമരുന്ന് കടത്ത്, അതിര്ത്തി കടന്നുള്ള കുറ്റകൃത്യങ്ങള് എന്നിവയെല്ലാം വര്ദ്ധിച്ചു കൊണ്ടിരിക്കുകയാണ്. ഈ പ്രശ്നം ഇനിയും തുടരുകയാണെങ്കില് അത് രാജ്യത്തിന് അപ്പുറത്തുള്ള സുരക്ഷയെ വരെ ബാധിച്ചേക്കാമെന്നും’ ഷെയ്ഖ് ഹസീന പറഞ്ഞു.
