വയനാട് : ജില്ലയിൽ ഷിഗല്ല ബാധ സ്ഥിരീകരിച്ചതിനെത്തുടർന്ന് കടുത്ത ജാഗ്രതയിൽ ആരോഗ്യവകുപ്പ്. കോളിയാടി സ്കൂളിൽ ഷിഗല്ല ബാധ റിപ്പോർട്ട് ചെയ്ത സാഹചര്യത്തിൽ മുൻകരുതൽ നടപടിയായി ജില്ലയിലെ വിവിധ പ്രദേശങ്ങളിലെ വിദ്യാഭ്യാസ സ്ഥാപനങ്ങൾക്ക് ജില്ലാ ഭരണകൂടം അവധി പ്രഖ്യാപിച്ചു.
നെൻമേനി, അമ്പലവയൽ, നൂൽപ്പുഴ എന്നീ പഞ്ചായത്തുകളിലെയും സുൽത്താൻബത്തേരി മുനിസിപ്പാലിറ്റിയിലെയും എല്ലാ വിദ്യാഭ്യാസ സ്ഥാപനങ്ങൾക്കുമാണ് അവധി ബാധകം. ഇന്ന് മുതൽ ജൂൺ 14 വരെയാണ് അവധി പ്രഖ്യാപിച്ചിരിക്കുന്നത്.
സ്കൂളുകൾക്ക് പുറമെ മദ്രസകൾ, അങ്കണവാടികൾ, പഠന മുറികൾ, ഹോസ്റ്റലുകൾ, ട്യൂഷൻ സെന്ററുകൾ, പ്രൊഫഷണൽ കോളേജുകൾ എന്നിവയുൾപ്പെടെയുള്ള എല്ലാ വിദ്യാഭ്യാസ കേന്ദ്രങ്ങളും ഈ ദിവസങ്ങളിൽ പ്രവർത്തിക്കാൻ പാടില്ല.രോഗവ്യാപനം തടയുന്നതിനായി ആരോഗ്യവകുപ്പ് നൽകുന്ന നിർദ്ദേശങ്ങൾ കർശനമായി പാലിക്കാൻ അധികൃതർ നിർദ്ദേശിച്ചു. പൊതുജനങ്ങൾ തികഞ്ഞ ജാഗ്രത പുലർത്തണമെന്നും പരിഭ്രാന്തരാകേണ്ടതില്ലെന്നും ആരോഗ്യ വകുപ്പ് അറിയിച്ചു. പ്രതിരോധ പ്രവർത്തനങ്ങൾ യുദ്ധകാലാടിസ്ഥാനത്തിൽ നടന്നു വരികയാണ്. ഷിഗല്ല അണുബാധയെ പ്രതിരോധിക്കാനുള്ള ഈ നിർണ്ണായക നടപടി വിദ്യാർത്ഥികളുടെയും നാട്ടുകാരുടെയും സുരക്ഷ ഉറപ്പാക്കുന്നതിനാണ്. പനി, വയറിളക്കം തുടങ്ങിയ ലക്ഷണങ്ങൾ കണ്ടാൽ ഒട്ടും വൈകാതെ വൈദ്യസഹായം തേടാൻ ശ്രദ്ധിക്കുക.
