കങ്ങഴ : ശോഭായാത്രക്കിടെ സാമൂഹികവിരുദ്ധരുടെ ആക്രമണം. ഇടയിരിക്കപ്പുഴ സ്വദേശി ഹരിമന്ദിരത്തില് വിഷ്ണുവിന് (24) പരിക്കേറ്റു. ബാലഗോകുലം അധികൃതരുടെ പരാതിയില് രണ്ടു പേര്ക്കെതിരെ കേസെടുത്തതായി കറുകച്ചാല് പോലീസ് അറിയിച്ചു. ബാലഗോകുലം കങ്ങഴ യൂനിറ്റിന്റെ നേതൃത്വത്തില് വ്യാഴാഴ്ച നടത്തിയ ശോഭായാത്ര കങ്ങഴ ക്ഷേത്രത്തിലെത്തി അവല്കിഴി സമര്പ്പണം നടത്തുന്നതിനിടയിലാണ് രണ്ടുപേര് ബഹളമുണ്ടാക്കിയത്. തിരക്ക് നിയന്ത്രിക്കുന്നതിനിടയില് ഇവരോട് മുന്നോട്ട് മാറിനില്ക്കാന് പറഞ്ഞ വിഷ്ണുവിനെ ഇരുവരും ചേര്ന്ന് ആക്രമിക്കുകയായിരുന്നു. കൈക്ക് പരിക്കേറ്റ വിഷ്ണു കോട്ടയം മെഡിക്കല് കോളേജില് ചികിത്സ തേടി.
