അത്തിക്കയം : രാഷ്ട്രീയവൈരികളാല് ദാരുണമായി കൊല്ലചെയ്യപ്പെട്ട ഷുഹൈബ് ,കൃപേഷ് , ശരത് ലാല് എന്നിവരെ അനുസ്മരിച്ചു. യൂത്ത് കോൺഗ്രസ് നാറാണംമൂഴി മണ്ഡലം കമ്മിറ്റിയുടെ നേതൃത്വത്തിൽ നടന്ന അനുസ്മരണ സമ്മേളനം കെപിസിസി സെക്രട്ടറി റിങ്കു ചെറിയാൻ ഉദ്ഘാടനം ചെയ്തു. കോൺഗ്രസ് പതാകയേന്തി എന്ന കുറ്റം ആരോപിച്ച് നിരപരാധികളായ ചെറുപ്പക്കാരെ കൊന്നൊടുക്കുവാൻ സിപിഎം പ്രാദേശിക നേതാക്കൾ ശ്രമിച്ചപ്പോൾ അതിൽ പ്രതികളായവരെ സംരക്ഷിക്കാൻ ഹൈക്കോടതിയിലും സുപ്രീം കോടതിയിലും കോടിക്കണക്കിന് രൂപ ചെലവാക്കി കൊലപാതക രാഷ്ട്രീയത്തെ പ്രോത്സാഹിപ്പിച്ചതിന്റെ ഫലമാണ് ഇന്ന് സംസ്ഥാനത്തെ ക്രമസമാധാന തകർച്ചയും ഗുണ്ടാവിളയാട്ടവും ബോംബേറുകളും എന്ന് അദ്ദേഹം പറഞ്ഞു. യൂത്ത് കോൺഗ്രസ് മണ്ഡലം പ്രസിഡന്റ് ഷിജോ ചേന്നമല അദ്ധ്യക്ഷത വഹിച്ചു. സണ്ണി മാത്യു, രാജൻ നീറംപ്ലാക്കൽ, പ്രമോദ് മന്ദമരുതി, അഡ്വ സാംജി ഇടമുറി, ബീനാ ജോബി, ജെറിൻ പ്ലാച്ചേരിൽ, ഷിബു തോണിക്കടവിൽ, നീതു സാബു, സുനിൽ കിഴക്കേചരുവിൽ, സുനിൽ. പി. ജോൺ, നിധിൻ എന്നിവർ പ്രസംഗിച്ചു.
