ടെംപിള് ടെക്സസ് : അമേരിക്കന് മലയാളികളില് മുതിര്ന്ന തലമുറയിലെ അംഗമായ ഡോ. ശ്യാമള നായര് അന്തരിച്ചു. കഴിഞ്ഞ നാല്പ്പത്തിയഞ്ച് വര്ഷമായി ടെംപിള് ടെക്സസിലെ ഇന്ത്യന് സമൂഹത്തിലെ നിറസാന്നിധ്യമായിരുന്ന ഡോ. ശ്യാമള നായര് സെപ്റ്റംബര് 13 നായിരുന്നു അന്തരിച്ചത്. കേരളത്തില് തിരുവനന്തപുരത്തു ജനിച്ച് 1970 ല് ഭര്ത്താവ് ഡോ. പി കെ നായര്ക്കൊപ്പം അമേരിക്കയിലെത്തിയ ശ്യാമളനായര് അറിയപ്പെടുന്ന പീഡിയട്രീഷ്യന് ആയിരുന്നു.
1975 ലാണ് ടെംപിളിലേക്കു താമസത്തിനായി എത്തിയത്. അന്നുമുതല് ടെംപിള് ഇന്ത്യന് സമൂഹത്തിനു താങ്ങും തണലുമായി പ്രവര്ത്തിച്ചു. ടെംപിളിലെ ഹിന്ദു ക്ഷേത്ര നിര്മാണത്തിലും നടത്തിപ്പിലും മുന്കൈഎടുത്തതും ഡോ. ശ്യാമള നായര് ആയിരുന്നു. ടെംപിളിലെ ഡാര്ണെല് ആര്മി ഹോസ്പിറ്റല് ആയിരുന്നു ജോലി ചെയ്തിരുന്നത്.
സെന്ട്രല് ടെക്സസിലെ ഹിന്ദു സമൂഹത്തില് ആത്മീയ പ്രഭാഷണങ്ങള് നടത്തുകയും കുട്ടികളെയും മുതിര്ന്നവരെയും ആത്മീയ ധാരയിലേക്കടുപ്പിക്കുകയും ചെയ്യുന്ന പ്രവര്ത്തനങ്ങളില് മുഴുകിയിരുന്ന ശ്യാമള നായരുടെ നിര്യാണം അമേരിക്കയിലെ ഹിന്ദു സമൂഹത്തിനു തീരാനഷ്ടമാണെന്നു കെ എച്ച്എന്എ പ്രസിഡന്റ് ജി.കെ പിള്ള പറഞ്ഞു. ഭര്ത്താവ് ഡോ. പി കെ നായര് രണ്ട് ആണ്മക്കളും നാലു പേരക്കുട്ടികളോടൊപ്പമാണ് ശ്യാമള നായര് കഴിഞ്ഞിരുന്നത്. സെപ്റ്റംബര് 18 നു ടെംപിളിലെ സാനിയോ ഹാര്പ്പര് ഫ്യൂണറല് ഹോമില് 10 മുതല് 12 വരെ പൊതുദര്ശവും തുടര്ന്ന് സംസ്കാര ചടങ്ങുകളും നടക്കുമെന്ന് കുടുംബാംഗങ്ങള് അറിയിച്ചു.